Հայաստանում տեղի ունեցածը միջազգային սկանդալ կդառնար, եթե տեղի ունենար մեկ այլ երկրում․ ակցիա՝ ի պաշտպանություն քաղբանտարկյալների (տեսանյութ)
«Հայաստան» դաշինքը Հայաստանում ՄԱԿ-ի ներկայացուցչության դիմաց բողոքի ակցիա է կազմակերպել՝ ի պաշտպանություն ապօրինի ձերբակալված բոլոր քաղբանտարկյալների:
«Դիմադրության» շարժման անդամ Սևակ Նազարյանը նշեց, որ ակցիայի նպատակը ՄԱԿ-ի հայաստանյան ներկայացուցչության մոտ Հայաստանում քաղբանտարկյալների, ապօրինի անազատության մեջ պահվող անձանց մասին բարձրաձայնելն է։
Նա նաև հիշեցրեց, որ այս ընթացքում շուրջ 5 տասնյակ քաղաքական բանտարկյալ է եղել Հայաստանում։ Ընդդիմության ներկայացուցիչը վստահ է՝ հրահանգը իշխանական կենտրոններից է եղել։
«Քաղաքական բանտարկյալի կարգավիճակ են ստացել մարդիկ, ովքեր իրենց համայնքներում արժանապատիվ կերպով հաղթանակ են տարել այս իշխանության դեմ, քաղաքական բանատարկյալի կարգավիճակ են ստացել մարդիկ, ովքեր այս ընթացքում չեն լռել, պայքարել են այս իշխանության դեմ, բարձրացրել են ազգային հարցեր, որոնք այս իշխանության կողմից ոտնահարված են»,-ասաց Սևակ Նազարյանը։
Նա հիշեցրեց, որ հուլիսի 15-ին, հենց դատական նիստի ժամանակ, մահացավ Արմեն Գրիգորյանը: «Մարդ, ով վերջին տարիներին անկախ ամեն ինչից, երբեք չէր վախեցել խոսել, իսկ մահացել է, որովհետև չի դիմացել այն ճնշմանը, որը ստեղծել էր այս իշխանությունն իր և մեր հայրենիքի նկատմամբ»,-ընդգծեց ակտիվիստը։
Նա վստահ է, որ եթե այս ամենը տեղի ունենար մեկ այլ երկրում, ապա միջազգային սկանդալ կդառնար, եթե միջազգային հանրության կոչվածը ճիշտ արձագանքեր դրան։
Սևակ Նազարյանի խոսքով, այսօր էլ անազատության մեջ գտնվող մեր որոշ հայրենակիցներ ունեն առողջական խնդիրներ, ինչը նորից անտեսվում է իրավապահ մարմինների կողմից։
«Հստակ արձանագրում ենք՝ այս իշխանությունը հագենում է այն արյունից, որը թափում է իր հայրենակիցը, այն արյունից, որն իր իշխանությունը պահելու համար պատաստ է ամեն օր հեղել», - ընդգծեց նա։