Ուր կշպրտեն Արման Սարգսյանին իր անգրագիտությամբ, եթե հանկարծ մի օր նա դադարի ՔՊ անդամ լինելուց
Ադրբեջանական ԶՈւ-ն տարբեր տրամաչափի հրաձգային զինատեսակներից կրակ է բացել Վայոց Ձորում տեղակայված հայկական մարտական դիրքերի ուղղությամբ։ Այս մասին լուրը, հերթական անգամ, ՀՀ պաշտպանության նախարարության կողմից հաստատվեց միայն այն բանից հետո, երբ տեղեկությունը շատ արագ համացանցով տարածվեց։
Ու չնայած ՊՆ-ից նման տեղեկություններն «աքցանով ես քաշում», սակայն, օրինակ, Պաշտպանության փոխնախարար Արման Սարգսյանն ավելի քան համոզված է, որ «ՊՆ-ն չի կարող որևէ բան թաքցնել, չի կարող լինել որևէ սահմանային միջադեպ, որի մասին ՊՆ-ն լռի» (մեջբերում)։
Նա լրագրողների հետ զրույցում նաև ասաց, որ ՊՆ-ում բոլորն էլ, ու հատկապես ինքը, շատ հասանելի են լրագրողներին․ «Պարբերաբար շփվել եմ»,- ասաց նա։
Հարկ է նկատել, սակայն, որ այդ ամենը փոխնախարարն ասում էր գրեթե վազելով՝ իրականում փախչելով լրագրողներից, ինչպես անում է սովորաբար։ Այնպես որ, լրագրողները ստիպված եղան նրա հետևից վազել, որպեսզի որոշ մանրամասներ իմանան թշնամու արձակած կրակոցների ու դրանց հետևանքների մասին։
Արման Սարգսյանն այդտեղ էլ փայլեց իր «հանճարեղ» մտքով՝ ասելով, թե «Մեր սահմանը փոխվել է, մեր ամբողջ սահմանագիծը փոփոխության է ենթարկվել, ու չի բացառվում, որ այլ վայրերում ևս հնչեն կրակոցներ»․․․
Իհարկե, այստեղ չի քննարկվում այն, որ «Հանրաքվեի մասին» ՀՀ սահմանադրական օրենքի 4-րդ հոդվածի 1-ին մասի 3-րդ կետի համաձայն՝ Հայաստանի տարածքի փոփոխության վերաբերյալ հարցերը պարտադիր որոշվում են հանրաքվեի միջոցով։
Հարցն այն է, որ, ինչպես և ոստիկանապետ եղած ժամանակ, այնպես էլ այսօր՝ որպես ՊՆ փոխնախարար, Արման Սարգսյանն իր զբաղեցրած պաշտոնին չի համապատասխանում, քանի որ պարզապես չի տիրապետում իր գործունեությանը։
ՊՆ այս բարձրաստիճան պաշտոնյան իրավունք չուներ հայտարարելու, որ սահմանագիծը փոփոխության է ենթարկվել, քանի որ ոչ միայն սահման փոխելու համար չի եղել հանրաքվե, այլև թշնամին ներխուժել է Հայաստանի Հանրապետության սուվերեն տարածք, ավելին՝ նույնիսկ չեն եղել սահմանազատման ու սահմանագծման աշխատանքներ:
Սահմանային կարգավիճակից ու, առհասարակ, վիճակից անտեղյակ ՊՆ փոխնախարարը հայտարարում է, թե սահմաններ են փոխվել, կրակոցներ կարող են լինել…
Իբր քիչ է, որ Պաշտպանության փոխնախարարը, փաստորեն, սահմանները ճանաչում է «փոփոխված», դեռ մի բան էլ հանգիստ տոնով ասում է, թե՝ կրակոցներ կլինեն․․․․
Մյուս կողմից էլ փոխնախարարին կարելի էր հարցնել՝ պարոն փոխնախարար, բա էդ Դուք ու Ձեր կառավարությո՞ւնը չէիք «խաղաղության դարաշրջան» ստեղծում, բա սա՞ է ձեր «խաղաղության դարաշրջան»-ը, էլ ի՞նչ «խաղաղության դարաշրջան», եթե դեռ պետք է կրակոցներ հնչեն ու զոհեր լինեն։
Եվ, ի վերջո, այս ամենով հանդերձ, հարկ է հիշել ԱԺ նախագահ Ալեն Սիմոնյանի հնչեցրած միտքը։ Նա մի առիթով ասել է, թե՝ «Արման Սարգսյանը, եթե մեր թիմի անդամ չլիներ, ոստիկանապետ չէր լինի»․․․ նույնը կարելի է ասել նրա փոխնախարար լինելու վերաբերյալ, ինչն իր հերթին խոսում է Արման Սարգսյանի անգրագետ պաշտոնավարման մասին։
Մնում է միայն հասկանալ, թե ինչ կլինի նրա հետ կամ ուր կշպրտվի, հենց ՔՊ անդամ չլինի․․․