Հարազատ գյուղի, հարազատ դպրոցում բացվեց 44-օրյա պատերազմում զոհված տղաների, մանկության ընկերներ` Միշայի ու Էրիկի անկյունը (լուսանկարներ)
Արցախյան 44֊օրյա պատերազմում զոհված հերոսներ Էրիկ Խաչատրյանի և Միշա Գրիգորյանի հիշատակին, նրանց հայրենի գյուղի` Մղարթի հիմնական դպրոցում բացվել է անկյուն։ Այդ մասին ֆեյսբուքյան իր էջում հայտնել է Միշայի մայրը՝ Աննա (Շուշան) Թամազյանը։ Օրվա տպավորությունների մասին հերոսի մայրը մասնավորապես գրել է.
«Այսօր առավոտից ամեն ինչ Միշայով է սկսվել։ Հարազատ գյուղի, հարազատ դպրոցում բացվեց 44-օրյա պատերազմում զոհված տղաների` Միշայի ու Էրիկի անկյունը։
Ուղեկցվեց գեղեցիկ միջոցառումով, ներկա էին հարգարժան հյուրեր։ Երեխաները արտասանեցին ու երգեցին հայրենասիրական ոգով, հուզվեցին ոմանք` հենց բեմի վրա։
Բոլորս էինք հուզված
Դպրոցի տնօրեն` Պարոն Աղաբեկ Մոսինյանի որոշմամբ` ամեն տարվա հունվարի 20- ը դպրոցում կլինի տղաների հիշատակի օր, կկազմակերպվի միջոցառում, և օրը կնվիրվի իրենց կյանքը հայրենիքին նվիրված քաջերին։
Իհարկե պիտի գնահատվի տղերքի կատարածը, իհարկե պիտի նրանց օրինակով դաստիարակվեն սերունդներ, պիտի Միշաների ու Էրիկների հիշատակը վառ պահեն բոլորը։
Շնորհակալ եմ բոլոր այն մարդկանց, ովքեր աջակցել են անկյան ստեղծմանը, ովքեր կազմակերպել են գեղեցիկ միջոցառումը։ Չեմ ուզում անուններ նշել, որպեսզի բացթողումներ չլինեն։ Ուղղակի ասում եմ շնորհակալություն:
Երեկոն նույնպես Միշայական էր։
Հարազատների նեղ միջավայրում, հերթական անգամ խոսեցինք Միշայիցս, նրա զրույցներն էինք վերլուծում, սիրած վիդեոները։ Շաատ շատ խոսեցինք Միշայիցս, զուսպ ծիծաղից,նուրբ հումորից, սիրած արտահայտություններից, երբեք ոչ ոքի չնմանվող տեսակից, համեստությունից, աչքերից, հայացքից, ամեն ամեն ինչից։ Լսած երգերը լսեցինք ( իհարկե արտակարգ երաժշտություն) և ընկանք հիշողության գիրկը, կարծես մեզ հետ էր, մեր կողքին։ Եվ իսկապես ամեն ինչում Միշաս էր։
Շնորհակալ եմ այս հագեցած օրվա համար, որտեղ թթվածին էլ էր Միշա»: