Հայաստան վերադարձած 10 գերիներից 5-ը ձերբակալված են, նրանց կալանավորելու միջնորդություն է ներկայացվել. «Փաստինֆո»

Դեկտեմբերի 4֊ին գերությունից վերադարձած 10 զինծառայողներից հինգը ձերբակալված են՝ ՔԿ-ում քննվող քրեական գործի շրջանակներում։ Այս մասին «Փաստինֆո»֊ի հետ զրույցում ասացին ՀՀ քննչական կոմիտեից։

Նույն աղբյուրի փոխանցմամբ՝ նրանց մեղադրանք է առաջադրվել ՀՀ քրեական օրենսգրքի 365֊րդ հոդվածի 3֊րդ մասի հատկանիշներով՝ մարտական հերթապահության կամ ծառայության կանոնները խախտելը, որն առաջացրել է ծանր հետևանք։ Նրանց նկատմամբ կալանավորումը որպես խափանման միջոց ընտրելու մասին միջնորդություն է ներկայացվել դատարան։

Հիշեցնենք, որ նոյեմբերի 16-ին ադրբեջանական ագրեսիայից հետո ՀՀ ՊՆ-ն հաղորդեց 13 գերեվարված և 24 անհետ կորած զինծառայողի մասին, սակայն Նիկոլ Փաշինյանը ավելի ուշ՝ առցանց ասուլիսի ժամանակ տեղեկացրեց, որ Սյունիքում ադրբեջանական ագրեսիայի հետևանքով անհետ կորած համարվող 24 զինծառայողները գերեվարվել են ու շրջանառության մեջ դրեց «24+8» բանաձեւը։

Դեկտեմբերի 4-ին ռուսական կողմի միջնորդությամբ Հայաստան է տեղափոխվել 10 ռազմագերի, որոնք գերեվարվել էին նոյեմբերի 16-ին՝ ՀՀ ինքնիշխան տարածքից՝ ադրբեջանական ագրեսիայի հետևանքով։ Ավելի վաղ հայտնել էինք, որ նրանք հարցաքննվել են՝ քրեական գործի շրջանակներում։