Հակակոռուպցիոն կոմիտեն արձագանքել է «Դավիթ Հարությունյան» դաշինքի անդամների ձերբակալության մասին լուրին
Հակակոռուպցիոն կոմիտեն, արձագանքելով «Դավիթ Հարությունյան» դաշինքի առաջին համարի և դաշինքի շտաբը համակարգողներից Գևորգ Սաքանյանի ձերբակալության մասին Newspress.am-ի տեղեկատվությանը` նշել է, որ հիշյալ անձինք բերման են ենթարկվել, բայց ձերբակալված չեն։
Ավելի վաղ հայտնել էինք, որ «Դավիթ Հարությունյան» դաշինքի առաջին համարը՝ Դավիթ Հարությունյանը և այս դաշինքի շտաբը համակարգողներից Գևորգ Սաքանյանն այսօր առավոտյան ձերբակալվել են:
Նույն աղբյուրները փոխանցում են, որ ձերբակալվածներն այժմ գտնվում են Երևանում՝ Հակակոռուպցիոն կոմիտեում։
Հիշեցնենք, որ դեկտեմբերի 5-ին Վայոց ձորի Եղեգնաձոր խոշորացված համայնքում համամասնական ընտրակարգով տեղի է ունենալու ավագանու անդամների ընտրություն։ Եղեգնաձոր համայնքի մեջ ընդգրկված են Գետափ, Գլաձոր, Եղեգնաձոր, Մալիշկա, Վերնաշեն բնակավայրերը։ Համայնքն ունի 14508 ընտրող, իսկ ավագանու կազմը բաղկացած է լինելու 21 անդամից։ Եղեգնաձորում ընտրապայքարին մասնակցելու են 4 կուսակցություններ և 1 դաշինք։