Ինձ համար ծիծաղելի է․ Արա Աբրահամյանը՝ Ադրբեջանի կողմից իր նկատմամբ հայտարարված միջազգային հետախուզման մասին
«Ռուսաստանի հայերի միություն» հասարակական կազմակերպության ղեկավար Արա Աբրահամյանն անդրադարձել է Ադրբեջանի կողմից իր հանդեպ միջազգային հետախուզում հայտարարելու տեղեկությանը։ Այս մասին հայտնում է «РИА Новости» գործակալությունը։
Աբրահամյանը մասնավորապես ասել է․ «Այն, ինչ նրանք հորինում են՝ անհեթեթություն է և ինձ չի հուզում։ Ինձ համար ծիծաղելի է։ Ես մեղավոր չեմ, և ես խնդիրներ ունենալ չեմ կարող։ Ավելի լավ է նրանք զբաղվեն իրենց հանցագործներով, որոնք խախտում են մարդու իրավունքները Ղարաբաղում»։
Աբրահամյանը նշեց, որ դեռևս Բաքվի կողմից չի ստացել որևէ պաշտոնական տեղեկություն կամ ծանուցում։ «Երբ ստանանք, փաստաբանները, իհարկե, կզբաղվեն»,-նշել է Աբրահամյանը։
Նա նաև նշել է, որ պատրաստվում է դիմել միջազգային դատական ատյաններին, որպեսզի «պահանջի Ադրբեջանի հանցագործությունների հետաքննություն անցկացնել»։
«Կարծում եմ՝ կգա ժամանակը, երբ նրանց կդատեն»,-նշել է Աբրահամյանը։