«Վեոլիա ջուր» ընկերությունում շղթայական «բարդակ» է. բնակչությանն էշի տեղ են դրել (տեսանյութ)
Հայաստանում անտերություն է: Այլևս փաստացի ու բառի բուն իմաստով: Իսկ այդ անտերությունը վերածվում է ամենաթողության այնտեղ, որտեղ հանդիպում է մենաշնորհի:
«Վեոլիա ջուր» ընկերությունում բառի ամենաուղիղ իմաստով բարդակ է: Առնվազն՝ ստորին օղակներում, իսկ ստորին օղակների պատասխանատվությունը պետք է կրեն վերին օղակները:
Երեկ, ի թիվս այլ հասցեների՝ Մալաթիա-Սեբաստիա վարչական շրջանի որոշ հատվածներում անսպասելի անջատվել էր ջուրը: Վթար էր: Առավոտյան՝ ժամը 11-ի դրությամբ: Բնակիչներին տարբեր բաներ էին ասել վերականգնելու ժամի հետ կապված. 2 ժամից, ժամը 16:00-ին, հետո նամակ էր ստացվել ընկերությունից ջրի՝ ժամը 21:00-ին վերականգնելու մասին:
Մի կողմ թողնենք այն, թե որքան անհարմարություն է բնակչությանը պատճառում անսպասելի ջրանջատումը՝ խմելու ջրից մինչև սանհանգույց: Բայց այդ անհարմությանը գումարվում է նաև հեռախոսավարների անպատասխանատու աշխատանքը, որոնք 2 ժամ անդադար՝ ժամը 21:00-23:00, չեն պատասխանում որևէ զանգի: Մինչդեռ ընկերության կայքում հպարտորեն գրում են, որ հեռախոսային կենտրոնն աշխատում է 24/7/365 ռեժիմով: Դրան գումարած ֆեյսբուքյան էջի աշխատակիցների՝ գլուխն ավազի մեջ թաղելու և անհաճո մեկնաբանություններն անտեսելու գործելաոճը, իսկ վերջում՝ ընկերության երբեմնի բարեխիղճ խոսնակ Մուրադ Սարգսյանի անտակտ վերաբերմունքը լրատվամիջոցի ահազանգին ի պատասխան: Երբեմնի խոսնակը, ով նախկինում կարող էր կես ժամ բացատրել ջրատարների աշխատանքը, այժմ, լսելով այն, որ զանգահարել եմ իրեն՝ մեկնաբանություն ստանալու, որպեսզի հրապարակումս միակողմանի չլինի, ասաց հետևյալը.
«Չէ, Դուք կարաք ձեր ցանկացած նյութ անեք՝ քանի կողմանի ուզում եք, խնդիրն այն է, որ ես էդ հարցով չեմ զբաղվում, դրա համար հընթացս մեկնաբանել չեմ կարող: Ես հիմա Ձեր հեռախոսին կուղարկեմ մեյլը, Դուք Ձեր նամակն ուղղեք դրան, համապատասխան անձը Ձեր հետ կկապվի, կպարզաբանի: Ես հիմա Ձեզ կուղարկեմ»: Հարցին, թե ո՞վ է համապատասխան անձը, պատասխանեց՝ կպատասխանի, կիմանաք: Չլսելով շարունակությունը՝ բարկացած Մուրադն անջատեց հեռախոսը, այնուհետև անջատեց հաջորդ զանգն ու այլևս զանգերի չպատասխանեց: Օ՜, դաստիարակություն:
Ինչևէ: Ուղարկված մեյլով ես արդեն դիմել եմ՝ թողնելով հեռախոսահամար, որ ինձ հետ կապվեն: Ինչպես սպասելի էր այս «թռնողների ոհմակից», էլհասցեի պատասխանատուները ևս «տեղում չէին»: Զանգահարելու փոխարեն գրել էին շատ «խոսուն» մի տեքստ. «Ձեր նամակն ընդունվեց: Շնորհակալություն մեզ դիմելու համար: Հարգանքով՝ «Վեոլիա Ջուր» ՓԲԸ»: Ինչպես հասկացաք, այստեղ մարդկանց էշի տեղ դնելը պարզապես ձեռագիր է:
Վերադառնանք եղելությանը:
Նախ նշենք, որ նախանշված ժամը 21:00-ի փոխարեն ջուրը «վերադարձավ» միայն 12 ժամ անց՝ 23:00-ի սահմաններում: Բայց կուրիոզն այն է, որ, ասենք, ժամը 21:25-ի դրությամբ և դրանից հետո էլ, ջրանջատումների մասին «խոսող» ինքնապատասխանիչն ասում էր, որ ջրամատակարարումը կվերականգնվի ժամը 21:00-ին:
«Վեոլիայում» առհասարակ կյանքը հետ է: «Վեոլիա»-ում ջուր անջատելու մասին SMS-ն էլ են ուղարկում անջատումից, ասենք, ժամեր անց:
«Վեոլիայում» շղթայական անտերություն է, ու բոլորն իրենց գործից թռնող ու Մուրադի պես «իրար վրա» գցող են: Սա ծաղր է ոչ թե և ոչ միայն մեկ անձի, այլև հասարակ սպառողի նկատմամբ:
Իսկ մինչ խոսնակ-հեռախոսավար, ֆեյսբուքավար-ջիմեյլավար և այլ մանր-մունր աշխատակիցները, այս ամենի պատասխանատվությունը կրում է հենց ընկերությունը, որը հանդուրժում է այս անպատասխանատու վերաբերմունքը: Պատասխանատվություն կրում է ճիշտ այնպես, ինչպես կրում է խողովակների մաշվածության համար, որոնք չեն փոխարինվում և պայթում են շինարարական ամեն թեթև ցնցումից:
Աստղիկ Հովհաննիսյան