Բոլորս մի նավի մեջ ենք, մեր բոլորի շահերից է բխում, թե ով ավելի լավ կթիավարի նավը, որ այս ամենից դուրս գանք․ իմքայլականը՝ իրենց իշխանության մասին (տեսանյութ)
Մենք պետք է շատ բան վերաիմաստավորենք։ Այս մասին լրագրողների հետ ճեպազրույցում ասաց «Իմ քայլը» խմբակցության պատգամավոր Տաթևիկ Հայրապետյանը։
«Մենք պետք է հասկանանք, որ բոլորս գտնվում ենք մի նավում, եթե այս նավը խորտակվի՝ բոլորս ենք խորտակվելու և մեր բոլորի շահերից է բխում, թե ով ավելի լավ կթիավարի այդ նավը, որ այս ամենից դուրս գանք»,-ասաց իշխանությունը ներկայացնող խմբակցության պատգամավորը։
Ճշտող հարցին, թե այս իշխանությունը կարողանո՞ւմ է ճիշտ թիավարել, Տաթևիկ Հայրապետյանը զարմացած արձագանքեց․ «Այո՛, իհարկե»։
Դիտարկմանը, որ Փաշինյանը պատերազմում պետությանը տարավ պարտության, Հայրապետյանը նկատեց, որ այդ պատերազմը 2 տարում չառաջացավ։
«Պատմությունը մի կտրեք, Ալիևը 2003 թվականին էր ասում, որ գալու է գրավի Արցախն ու Երևանը։ Հիշեք՝ այդ ժամանակ ով էր նախագահը»,- ասաց պատգամավորը։
Լրագրողները նկատեցին, որ այնուամենայնիվ այդ տարիներին ոչ պատերազմ եղավ, ոչ էլ պարտություն, ինչին Հայրապետյանն արձագանքեց․ «Հա բայց մի օր պետք ա լիներ, չէ՞»։
Նա նաև նյարդային արձագանքեց այն դիտարկմանը, թե պատերազմը հրահրեց իշխանությունը։
«Ես ցավում եմ, որ դուք պատրաստ եք Հայաստանի իշխանությանը մեղադրել պատերազմ հրահրելու մեջ։ Դա շատ վատ բաների մասին է խոսում»,- ասաց նա։
Պատգամավորն ըստ էության չարձագանքեց դիտարկմանը, որ այնուամենայնիվ նախկին իշխանություններին հաջողվել է բանակցությունների միջոցով թույլ չտալ, որ պատերազմ լինի։ Ավելին՝ նա հեռացավ, երբ լրագրողները հարցրեցին, թե՝ այդ ինչպես եղավ, որ 2016 թվականին հաջողվեց ճիշտ ժամանակին կանգնեցնել պատերազմը, իսկ այս իշխանությանը դա չհաջողվեց։
Մանրամասները՝ տեսանյութում։