Ողջունում եմ նաև այն դատավորներին, որոնք բացահայտ իրենց աջակցությունը հայտնեցին ԲԴԽ նախագահին․ Գևորգ Դանիելյան
Կերկերուն ձայնի ելևէջներն անթաքույց մատնում էին՝ Ազգային ժողովի կանոնակարգի բացահայտ խախտմամբ ԲԴԽ նախագահին իբր «համարձակ» հարցեր տվողների առնվազն խորը ներքին հուզմունքը: Այս մասին ֆեյսբուքյան իր էջում գրել է իրավագիտության դոկտոր, արդարադատության նախկին նախարար Գևորգ Դանիելյանը։
«Իշխող ուժը ունակ չեղավ դիմակայելու դատական իշխանության անկախության իրական (ոչ թե հարթակային լոզունգներով) փորձին հակադարձելու գայթակղությանը:
Կերկերուն ձայնի ելևէջներն անթաքույց մատնում էին՝ Ազգային ժողովի կանոնակարգի բացահայտ խախտմամբ ԲԴԽ նախագահին իբր «համարձակ» հարցեր տվողների առնվազն խորը ներքին հուզմունքը: Կրկնում եմ դատավորի անկախությունը առաջնահերթ պետք է յուրաքանչյուր քաղաքացու (այդ թվում՝ «խրոխտ» կեցվածքով հարցեր հնչեցնողներին)՝ անկախ երբևէ դատարանում մասնակից լինելու հանգամանքից, դա իրապես բարվոք, ոչ թե կեղծ մթնոլորոտ ստեղծելու գրավական է:
Ողջունում եմ նաև այն դատավորներին, որոնք բացահայտ իրենց աջակցությունը հայտնեցին ԲԴԽ նախագահին, նրանք գիտակցում են, որ դատական իշխանության սկզբունքային շահերը հավուր պատշաճի երաշխավորող գործիչների դեմ նյութվող քայլերին չի կարելի անգամ դիտորդի կարգավիճակով վերաբերել, էլ չեմ ասում՝ նպաստել: Ինչևէ, ցավալի է այս ամենը, ցավալի է, որ կյանքի որակը որևէ կերպ բարելավելուն ուղղված գեթ մեկ օրինագիծ մշակելու, գործադիր իշխանության նկատմամբ արդյունավետ վերահսկողություն իրականացնելու համար անընդունակ մարդիկ դատական իշխանության նկատմամբ իրենց առաքելությունը տեսնում են սոսկ դատարանների դռներն արգելափակելու, հանրային հարթակները վերացական վիրավորանքի համար օգտագործելու մեջ, և սևեռվում բացառապես իրենց կանոնադրական գործառույթը ձախողելու վրա ….»,- գրել է Դանիելյանը։