Հայկ Մարությանը մասնակցել է Փաշինյանի հանրահավաքին, բայց հարթակում չի եղել
Հայկ Մարությանը երեկվա հանրահավաքին չէր բացակայում, պարզապես նա ժողովրդի շարքում էր: Այդ մասին NEWSPRESS.am-ի հետ զրույցում ասաց Երևանի քաղաքապետի մամուլի խոսնակ Հակոբ Կարապետյանը:
Պատասխանելով մեր հարցին, թե այդ դեպքում ինչո՞ւ նա բեմում չէր՝ Փաշինյանի կողքին, ինչպես նախկինում էր լինում, Կարապետյանը պատասխանեց. «Առանձնապես ոչ մի բան չկա»:
Մեկնաբանելով մամուլում ավելի վաղ հրապարակված տեղեկությունը, թե Մարությանը «յան է տվել» Փաշինյանից, Կարապետյանը բամբասանք որակեց:
Հիշեցնենք, որ Նիկոլ Փաշինյանն իր աջակիցներին մարտի 1-ին հրավիրել էր հանրահավաքի Հանրապետության հրապարակում: Իշխանության կողմից լայն թափով ներ էր դրվել վարչական ռեսուրսը:
Հարթակից, սակայն, բացակայում էր Երևանի քաղաքապետ Հայկ Մարությանը: Ըստ մամուլի հրապարակման՝ նա քաղաքապետարանի ռեսուրսները չի ներդրել` մարտիմեկյան իշխանական հավաքին «գլխաքանակ» ապահովելու համար: Միևնույն ժամանակ, ասել է, որ թաղապետարանների վրա ազդեցություն չունի` ինչ կանեն, թող անեն: Մարությանի այսպիսի դիրքավորումը Երևանի ավագանու իմքայլականների շրջանում բավական «ծանր են տարել»: