Հիմարություն է դուրս տվել․ Լևոն Քոչարյանը՝ Փաշինյանի հայտարարության մասին (տեսանյութ)
Այսօր Երևանի ընդհանուր իրավասության դատարանում, նախագահությամբ Աննա Դանիբեկյանի (Շենգավիթի նստավայր), կշարունակվի սահմանադրական կարգի ենթադրյալ տապալման գործով քննությունը։
Ռոբերտ Քոչարյանի աջակիցները հավաքվել են դատարանի մոտ։ Նրանք ծափահարություններով դիմավորեցին Սեյրան Օհանյանին և Յուրի Խաչատուրովին:
Քոչարյանի աջակիցները Լևոն Քոչարյանի հետ միասին քայլերթով բարձրացան Բաղրամյան պողոտա, որտեղ շարունակվում է Նիկոլ Փաշինյանի հրաժարականը պահանջող քաղաքացիների ակցիան։
Լրագրողի դիտարկամանը, թե Փաշինյանը հայտարարել է, որ Մարտի 1-ը բացահատված է՝ Լևոն Քոչարյանը ծիծաղով արձագանքեց։
«Նա ինչ-որ նոր բառեր է գտնում, որպեսզի քողարկի իրականությունը։ Բայց զոռով հրապարակ տարած մարդկանց պետք է մի բան ասեր, որովհետև մեկ օր առաջ էլ ինտրիգ մտցրեց, որ նոր բան կա ասելու։ Ուղղակի հիմարություն է դուրս տվել»,-ասաց Լևոն Քոչարյանը։
Հիշեցնենք, որ Քոչարյանի գործով անցնում են ՀՀ երկրորդ նախագահ Ռոբերտ Քոչարյանը, պաշտպանության նախկին նախարար Սեյրան Օհանյանը, ՊՆ ԶՈՒ Գլխավոր շտաբի նախկին պետ Յուրի Խաչատուրովը և նախագահի աշխատակազմի նախկին ղեկավար Արմեն Գևորգյանը։