«Իսկանդեր»-ի մասին հայտարարությունը պատահական չէր. Նիկոլ Փաշինյանը բացահայտ պատվեր կատարեց, և Ռուսաստանը չի ների. քաղաքագետ
Սա Հայաստանի հերթական խայտառակությունն էր, երբ վարչապետը նախ նշեց, որ «Իսկանդեր»-ը 80-ականների զենք է, այն դեպքում, երբ զենքն արտադրվում է 2006 թվականից, 80-ական թվականների մասին խոսք լինել չի կարող: Այդ մասին NEWSPRESS.am-ի հետ զրույցում ասաց քաղաքագետ Գագիկ Համբարյանը՝ անդրադառնալով վարչապետ Նիկոլ Փաշինյանի՝ սկանդալային հայտարարությանը ռուսական «Իսկանդեր»-ի աշխատունակության հետ կապված:
«Նաև տեսաք, որ շատ տարօրինակ թվաբանություն մեջբերեց՝ 10 տոկոսն է կրակել: Ես, անկեղծ ասած, ռազմական ոլորտի մասնագետ չեմ և հույս ունեմ, որ պատկան մարմինները, ինչպես նաև համապատասխան մասնագետներն անպայման կանդրադառնան՝ հնարավո՞ր է, որ 10 տոկոսը պայթեր, 90 տոկոսը՝ չպայթեր: Սա է խնդիրը: Սա ինքնըստինքյան շատ մեծ հարված էր հայ-ռուսական հարաբերություններին այն առումով, որ Մոսկվայում գիտակցում են, որ սա պատահական չէր: Ես ինքս էլ չեմ համարում, որ Նիկոլ Փաշինյանը պատահական է այս հայտարարությունն արել: Դավաճան Նիկոլ Փաշինյանը շատ լավ գիտի, որ զենքի վաճառքը Ռուսաստանի՝ միջազգային մասշտաբներով ամենահպարտանալու գործոններից մեկն է: Սա Ռուսաստանի եզակի արտադրանքն է, որը միջազգային ասպարեզում շատ բարձր պահանջարկ ունի: Եթե ուշադիր եղաք, ապա Նիկոլ Փաշինյանը փորձեց վարկաբեկել Ռուսաստանի նորագույն և ամենաթանկարժեք զինատեսակներից մեկը՝ «Իսկանդեր»-ը: Դուք ինքներդ գիտեք՝ միջազգային զինտեխնիկայի վաճառքի շուկայում շատ մեծ պայքար է գնում զինտեխնիկա արտադրող խոշոր տերությունների միջև, և սրանով Նիկոլ Փաշինյանը փորձեց լավամարդ դառնալ այն ուժերին, ովքեր իրենց ամբողջ գործունեության ընթացքում միշտ պայքարել են ռուսական զենքի դեմ միջազգային շուկայում»,- ասաց քաղաքագետը:
Համբարյանը ևս մեկ անգամ շեշտեց, որ այս հայտարարությունը պատահական չէր. «Նիկոլ Փաշինյանը բացահայտ պատվեր կատարեց և իհարկե սա արդեն իր արձագանքը ստանում է Ռուսաստանից, իհարկե, ոչ շատ բարձր մակարդակով: Ես չեմ էլ կարծում, որ ՌԴ նախագահը կարձագանքի Նիկոլի այս տգիտությանը, և արևմտյան որոշ ուժերին ծառայելու իր այս մոլուցքին, բայց իհարկե սա Մոսկվայի կողմից շատ խիստ արձագանքի կարժանանա: Եվ արդեն իսկ բավական կտրուկ արձագանքում են: Ես չեմ կարծում, որ հենց հիմա, բայց Նիկոլ Փաշինյանին կշարունակեն նվաստացնել և կշարունակեն պարտադրել կատարել այն, ինչ իրենց ձեռնտու է»,- ընդգծեց մեր զրուցակիցը:
Ճշտող հարցին, թե ըստ նրա ո՞ւմ պատվերն էր կատարում Փաշինյանը, Համբարյանը պատասխանեց. «Հայաստանում իրեն իշխանության բերած ուժերի՝ դրսի ուժերի: Նիկոլ Փաշինյանը միայն ներհայաստանյա՞ն պրոյեկտ էր: Իհարկե, ոչ: Այդ նույն ուժերը հիմա ուղղակիորեն աչք են փակում Փաշինյանի ոչ ժողովրդավար, ոչ իրավաչափ որոշումների նկատմամբ: Դրանք արևմտյան պետություններն են, ինչպես նաև ԱՄՆ-ն և խոշոր տրանսնացիոնալ ուժերը, այդ թվում նաև՝ հանրաճանաչ Սորոսի գրասենյակը»:
Ըստ քաղաքագետի՝ բազմիցս է ապացուցվել, թեկուզ հենց հունվարի 11-ի բանակցությունների ժամանակ, որ «Փաշինյանն ընդհանրապես ոչինչ է»:
«Նրան կանչում են, չեն հրավիրում, փաստաթղթեր են պարտադրում ստորագրել և վերջ: Հիմա այս ամենի նոր էտապ է սկսվում, և դուք կտեսնեք, որ Նիկոլ Փաշինյանը, ով պետական մտածելակերպից զուրկ է և չի հասկանում, որ իր ամեն վայրկյան իշխանության մնալն ուղղակիորեն վնասում է Հայաստանի Հանրապետությանը, կշարունակի նվաստանալ, միայն թե իշխանությունը պահպանի: Եվ դա շատ լավ նկատել են և՛ մեր ռազմավարական գործընկեր Ռուսաստանում, և՛ մեզ թշնամի և հակառակորդ համարող Ադրբեջանում, Թուրքիայում և այլ երկրներում: Այնպես որ, սպասենք, տեսնենք՝ ինչ նոր նվաստացումների է գնալու Նիկոլ Փաշինյանն իր այս հայտարարության համար»,- ասաց քաղաքագետը:
Ինչ վերաբերում է զենքի որակին և դրա հետագա վաճառքին, ապա Համբարյանի խոսքով, եթե զենքն այդքան անորակ էր, ապա Նիկոլ Փաշինյանն իրավունք ունի դիմել համապատասխան ատյաներ և չեղարկել մինչև հիմա կնքված զենքի պայմանագրերը, որով ապագայում պետք է զենք մատակարարվեր Հայաստանին:
«Իհարկե, Ռուսաստանն ինքնակամ երբևիցե չի հրաժարվի Հայաստանին զենք վաճառելուց, որովհետև զենքի վաճառքի շուկայում շատ լուրջ պայքար է գնում խոշոր տերությունների միջև՝ ԱՄՆ-ի, Իսրայելի, Ֆրանսիայի, Գերմանիայի, Իտալիայի, Չինաստանի, Հնդկաստանի և այլն: Այնպես որ՝ Նիկոլ Փաշինյանի պատիժն այլ ոլորտներում կդրսևորվի, որովհետև Ռուսաստանը սա չի ների. Նիկոլ Փաշինյանը կպավ ռուսական «ամենասուրբ» ոլորտներից մեկին՝ սպառազինությունների արտադրությանը, իսկ Ռուսաստանում շատ ծանր են տանում այդ քննադատությունները, հատկապես եթե այդ քննադատությունը գալիս է ռազմավարական գործընկեր Հայաստանի ղեկավարից»,- իր խոսքը եզրափակեց Համբարյանը:
Զրուցեց՝ Աստղիկ Հովհաննիսյանը