Փաշինյանն Օնիկ Գասպարյանին կատեգորիկ արգելել է «Իսկանդեր» կիրառել. Արամ Գաբրելիանովի հերթական ուշագրավ հայտարարությունը
ՀՀ վարչապետ Նիկոլ Փաշինյանը թույլ չի տվել օգտագործել «Իսկանդեր»-ը՝ Ադրբեջանի ստրատեգիական օբյեկտների ուղղությամբ։ Նման հայտարարությամբ տելեգրամյան իր ալիքում հանդես է եկել ռուսաստանաբնակ մեդիամենեջեր Արամ Գաբրիելյանովը:
«Մոտ մեկ ամիս առաջ Մոսկվայում շատ ծանր ու երկար զրույց եմ ունեցել Հայաստանի ԳՇ պետ Օնիկ Գասպարյանի հետ: Քանի որ խոսք գնաց «Իսկանդեր»-ների մասին, ապա կպատմեմ: Ամեն ինչ չեմ կարող պատմել, բայց, քանի որ Նիկոլը բարձրացրեց այդ բացառիկ զինատեսակի թեման, բառացի կմեջբերեմ Օնիկ Գասպարյանի ասածը։ Մնացածը ինքներդ որոշեք»,-գրել է Գաբրիելյանովը:
Ըստ Գաբրիելյանովի՝ Օնիկ Գասպարյանն իրեն ասել է.
«Պատերազմի 3֊րդ օրը, ես՝ որպես ԳՇ պետ, որոշեցի կիրառել «Իսկանդեր»-ը 2 ստրատեգիական օբյեկտների՝ Բաքու-Ջեյհան նավթամուղի և մեկ այլ օբյեկտի դեմ։ Փաշինյանը կատեգորիկ արգելեց, թեպետ ռուսները հասկացնել էին տվել, թե ձեր պատերազմն է ու ձեր գործը, ինչ ուզում եք՝ արեք։ Շուշիի անկումից 3 օր առաջ ես Փաշինյանին խնդրեցի թույլ տալ «Իսկանդեր»-ի երկու հարված հասցնել ուղիղ Շուշիի տակ կուտակված ադրբեջանցիների կենդանի ուժին։ Սակայն, Փաշինյանը կատեգորիկ արգելեց` ասելով, որ համաշխարհային հանրությունը մեզ կբզկտի, եթե մենք միաժամանակ սպանենք թշնամու մի քանի հազար զինվորների։Միակ անգամ ինձ թույլ տվեցին կիրառել «Իսկանդեր»-ն արդեն Շուշիի ուղղությամբ։ Ես այն կիրառեցի։ Մենք օգտվեցինք դրանից ու հասցրինք քաղաք մտցնել մի քանի տանկեր։ Երկու օր անց ինձ հրամայեցին թողնել Շուշին և նահանջել»: