Չիտեմ՝ հիմա դատախազները ոնց են մտածում, բայց համոզված եմ, որ մի օր գիտակցելու են, թե ինչ արվեց իրենց ձեռքով․ Ալումյան
ՀՀ երկորրդ նախագահ Ռոբերտ Քոչարյանի փաստաբան Հայկ Ալումյանը նկատում է՝ դատավոր Դավիթ Գրիգորյանից Քոչարյանի գործն ուղղակի խլեցին՝ նրա վրա գործ բացելով։ Դատապաշտպանի դիտարկմամաբ, այս գործն անարդար է ոչ թե դատավարության մեկնարկից ի վեր, այլ այդ գործը դատավոր Աննա Դանիբեկյանի մոտ հայտնվելու պահից, այն պահից, երբ որոշվել է, որ այդ գործը պետք է քննի դատավոր Աննա Դանիեբկյանը։
«Երբ դատավոր Աննա Դանիբեկյանն արձակուրդից վերադարձավ, Վճռաբեկ դատարանը գործն ուղարկեց առաջին ատյանի դատարան՝ մեր բողոքը չքննած։ Այսինքն, պահեցին այնքան ժամանակ գործը, մինչև եկավ այն դատավորը, ում իրենք վստահում էին, ում նախասիրությունը, տրամադրվածությունը գիտեին, կամ ում վրա կարող էին ավելի արդյունավետ ճնշում գործադրել։ Հենց այդ դատավորը եկավ, վճռաբեկ դատարանից գործն ուղարկվեց։ Եթե մի քանի օր շուտ ուղարկվեր առաջին ատյանի դատարան գործը, այդ դատավորի մոտ չէր կարող ընկնել։ Այս պահից սկսած պարզ դարձավ, որ դատավոր Աննա Դանիբեկյանը ընտրված է այն չափանիշով, որ ինքն ունի կոնկրետ տեսակետ այս գործի վերաբերյալ, և այդ տեսակետը խիստ հակասում է մեր տեսակետին»,- համոզմունքն այսպես հիմնավորեց փաստաբանը։
Նա նշեց, որ մինչ Դանիբեկյանի մոտ գործը հասնելը, վարչապետն ու ԱԺ-ն ցույց էին տվել, որ առանց կոմպրոմիսների պայքարելու են այն դատավորների դեմ, որոնք Ռոբերտ Քոչարյանի իրավունքը վեր կդասեն։
«Դրա վառ օրինակներից մեկն է, երբ պարոն Քոչարյանն ազատ արձակվեց կալանքից, եղավ մի մեծ հանրահավաք Հանրապետության հրապարակում, Փաշինյանը շատ կոպիտ ու ծայրահեղ գռեհիկ արտահայտություններ կիրառեց փաստացի այն դատավորի նկատմամբ, ով պարոն Քոչարյանին ազատ էր արձակել։ Դրանից հետո երկրորդ անգամ, երբ մեկ այլ դատավոր ազատ արձակեց պարոն Քոչարյանին, Փաշինյանը կոչ արեց արգելափակել դատարանները, մի բան, որ երևի մի քանի դար առաջ հնարավոր է՝ Աֆրիկայում տեղի ունեցած լիներ, բայց ես էլի կասկածում եմ, որ նման բան եղել է»,- հիշեցրեց Ալումյանը՝ ավելացնելով, երբ գործը հասավ Դանիբեկայնին, արդեն դատավորների ու Դանիբեկյանի համար պարզ էր, որ իշխանությունները չեն հանդուրժի որոշում կայացնել, որը հաճո չէ Փաշինյանին։
Ռոբերտ Քոչարյանի փաստաբանը չի բացառում, որ Դանիբեկյանն ընտրվել է՝ նրա խոցելիությունը հաշվի առնելով։
«Ես չգիտեմ՝ հիմա դատախազները ոնց են մտածում, բայց համոզված եմ, որ մի օր հաստատապես գիտակցելու են, թե ինչ արվեց իրենց ձեռքով։ Ես գիտեմ, որ դատախազությունում ավելի ու ավելի քիչ մարդ է մնում, ովքեր պատրաստ են այդ նպատակին ծառայել, գնալով ավելի ու ավելի դժվար է դառնում գտնել այնպիսի դատախազներ, որոնք կգան դատարան ու կստանձնեն այդ դերը։ Ես սա հաստատ գիտեմ, դատախազության ներսից գիտեմ»,- ասաց Ալումյանը։