Ներքին Խնձորեսկ ադրբեջանական զորք չի մտել. տեղի են ունենում պետական սահմանի ճշտման և հստակեցման խաղաղ աշխատանքներ՝ GPS-ի միջոցով. Երվանդ Մալունց
Խնձորեսկի գյուղապետ Երվանդ Մալունցը անդրադարձել է տեղեկություններին, թե Ներքին Խնձորեսկ ադրբեջանական զորքեր են մտել ու հերքել տեղեկությունը։
«Ի զգուշացումն և ի գիտություն սոցհարթակներում վխտացող կեղծ լրատվամիջոցների՝ պաշտոնապես հայտարարում եմ, որ Ներքին Խնձորեսկ ադրբեջանական ոչ մի զորք չի մտել. մի՛ զբաղվեք ապատեղեկատվություն տարածելով ու մի՛ փորձեք արհեստական խուճապ ստեղծել. Ներքին Խնձորեսկցին երբեք խուճապի չի մատնվում, մի՛ չարչարվեք ու ձեր երևակայությանն այդքան նեղություն մի՛ տվեք»,- ասված է հայտարարությունում։
Մալունցը տեղեկացրել է նաև, որ Ներքին Խնձորեսկի բնակիչները, զինվորի և հրամանատարության հետ անմիջական և մշտական կապի մեջ լինելով, մինչ օրս իրականացնում են գիշերային հերթապահություն՝ զինվորի հետ մեկտեղ հսկելով սահմանը, որտեղ վերջին օրերս տեղի են ունենում պետական սահմանի ճշտման և հստակեցման խաղաղ աշխատանքներ, իհարկե, Գլոբալ Տեղորոշման Համակարգի՝ GPS-ի միջոցով: