Մինչ Հայկ Մարությանը վայելում է արձակուրդը. Բաբաջանյան փողոցում 4 ամիս է՝ մարդաբոյ փոսեր են ու մշտական խցանումներ (տեսանյութ)

Հյուսիս-հարավ ավտոճանապարհի Առնո Բաբաջանյան փողոցի շինարարությունն ինչպես անհարթություններով՝ բողոքի ակցիաներով մեկնարկել էր, այդպես էլ շարունակվում է այսօր: Շուրջ չորս ամիս է՝ Բաբաջանյան փողոցը բառի ուղիղ իմաստով քանդած-փորած է, երթևեկությունը  թույլատրելի է միակողմանի. բաց է Իսակովի պողոտայից դեպի Բաբաջանյան-Րաֆֆի-Շերամ խաչմերուկը, հակառակը իբրև թե փակ է մի քանի քարի կտորով: Բայց դա բնավ էլ չի խանգարում վարորդներին բաց հատվածով հակառակ  երթևեկելու՝ առաջացնելով մեծ խցանում: 

Բ-4 թաղամասի մի քանի բնակչի խնդրանքով NEWSPRESS.am-ի թղթակիցը եղավ այդ հատվածում՝ փորձելով մեքենայով մտնել թաղամաս: Փողոցի այդ հատված ոտքով մտնել գրեթե անհնար էր, հետիոտնի տեղաշարժի համար մայթ առհասարակ չկար (տեսանյութում երևում է՝ ինչպես է մի կին երեխայի հետ «պայքարում» վարորդների դեմ, որ կտրի-անցնի փողոցը): Ինչ վերաբերում է բուն ճանապարհին, ապա երբեմնի հարթ ու ասֆալտապատ ճանապարհն այժմ հեռավոր գյուղական փողոց է հիշեցնում՝ մարդաբոյ փոսերով, նեղ ու վտանգավոր:

«Խցանումները տեսնել է պետք, որոնք առաջանում են աշխատանքային օրերին, երբ երթևեկությունն ավելի խիտ է: Լավ ժամանակ չեք եկել»,- ասացին մեր զրուցակիցները՝ նկատի ունենալով այն, որ մեր նկարահանման պահին ձյուն էր տեղացել և այդ պատճառով շատ վարորդներ պարզապես խուսափում են մեքենայով երթևեկելուց: 

«Նախկին ասֆալտից միայն լավ հիշողություն է մնացել»,- կատակում են նրանք: 

Վարորդներին, սակայն, մեղադրել չարժե՝ մեր այցելության պահին ևս շինաշխատանքներ չէին ընթանում, ինչն էլ ավելի է զայրացնում ինչպես այդտեղով անցնող վարորդներին, այնպես էլ թաղամասի բնակիչներին: 

«Փողոցը երևի շուրջ 4 ամիս է՝ միակողմանի փակ է:  Մեզ առաջարկում են ամբողջ Բ1-ը շրջանցենք՝ թաղ մտնելու համար, բայց այդպես էլ այդ երեք փողոցներում են անտանելի խցանումներ առաջանում: Օրենքով պիտի Րաֆֆիով, հետո Անդրանիկով, հետո նորից Բաբաջանյանով գանք, որ մտնենք մեր թաղամաս: Այստեղ հիվանդանոց կա, ու հաճախ կարելի է տեսնել, թե ինչպես են այնտեղ գնացող Շտապօգնության մեքենաները մնում խցանման մեջ: Լավ, գոնե գործ անեն, որ տեսնենք՝ էս ամենի վերջը մի օր գալու է: Մի ամսից ավել է՝ շինարարությունն ընդհանրապես կանգնած է»,- ասացին մեր զրուցակիցները՝ հույս հայտնելով, որ հրապարակումից հետո գոնե սայլը տեղից կշարժվի՝ արձակուրդը վայելող Հայկ Մարությանը վերջապես կհիշի, որ նաև իրենց քաղաքապետն է: 

Հեղ.՝ Աստղիկ Հովհաննիսյան