Դատավորներն էլ այսօր իրենց սահմանը պետք է պահեն. Քաջարանի քաղաքապետի խափանման միջոցի հարցով որոշումը կհրապարակվի վաղը
Երեւան քաղաքի ընդհանուր իրավասության դատարանը, վաղը՝ դեկտեմբերի 25-ին, ժամը՝ 10։20-ին կհրապարակի Քաջարանի քաղաքապետ Մանվել Փարամազյանի նկատմամբ կալանավորումը որպես խափանման միջոց ընտրելու վերաբերյալ քննիչի միջնորդության որոշումը։
Լրագրողների հետ զրույցում, News.am-ի փոխանցմամբ, Փարամազյանի պաշտպան Լուսինե Սահակյանն ասաց, որ վարույթն իրականացնող մարմինը չի կարողացել ներկայացնել փաստական հիմքեր.
«Վարույթն իրականացնող մարմինը, բնականաբար, չկարողացավ ներկայացնել փաստական հիմքեր, որոնցով կհիմնավորեր, որ Փարամազյանը որեւէ առնչություն ունի իրեն առաջադրված մեղադրանքի հետ։ Այսինքն՝ բացակայում էր հիմնավոր կասկածը»։
Սահակյանը նշեց, որ բացակայում են նաեւ Մանվել Փարամազյանին կալանավորելու հիմքերը։
«Մենք գտնում ենք, որ սա քաղաքական հետապնդում է։ Ամեն ինչ արվում է, որպեսզի անձինք, որոնք այսօր պահում են մեր սահմանները, Սյունիքը, եւ, որոնք թույլ չտվեցին, որ հողը հանձնած վարչապետը ոտք դնի Սյունիք, ամեն ինչ արվում է, որ նրանց հանեն սահմանից եւ հողն հանձնեն»,- ասաց պաշտպան Սահակյանը։
Լուսինե Սահակյանը նշեց, որ դատարան էին ներկայացվել որոշ փաստաթղթեր, որոնցով ակնհայտորեն հիմնավորվում էր, որ Փարամազյանը որեւէ առնչություն իրեն առաջադրված մեղադրանքի հետ. «Ավելին, նույնիսկ քրեական գործի նյութերում կային փաստեր, որոնցով հիմնավորվում էր, որ դեռեւս մայիս մասից Սյունիքի բազմաթիվ համայնքապետերի հետ կապված կան հետապնդումներ, եւ ամեն ինչ արվում է, որպեսզի որոշակի գործերով հետապնդում իրականացվի։ Այդ հարցը դատարանում բարձրացվել է, որ դեռեւս մայիս ամսից ամեն ինչ պարզ էր, պլանավորվում էին գործողություններ, որին մենք աշնանն ականատես եղանք։ Դա մայիս ամսին չէր ստացվել, այսօր արդեն այդ նույն նյութերով, որում նրա առնչությունը հաստատող ոչ մի ապացույց գոյություն չուներ, նույն նյութերով մտել են դատարան»։
Պաշտպան Սահակյանի խոսքով՝ այս օրերին դատավորներն իրենց պահում են որպես իրական դատավորներ, որոնք արդարադատություն են իրականացնում. «Դատարանները հասկացել են, որ այսօր իրենք պարտավոր են օրենքով ղեկավարվել։ Կարծում եմ՝ իրենք հասկացել են, որ այսօր իրենց որոշումներից մեր երկրի ապագան է կախված, մեր երկրի՝ լինել-չլինելն է կախված։ Մենք այդ հարցն էլ ենք բարձրացրել դատարանի առջեւ, որ այսօր իրենք էլ իրենց սահմանը պետք է պահեն։ Ինչպես այսօր Փարամազյանին, որը սահմանին կանգնած է, հանել են սահմանից ու ուզում են, որ նա սահմանը չպահի, ուրեմն դատավորները պարտավոր են իրենց սահմանը պահել»։
Նշենք, որ Մանվել Փարամազյանին մեղադրանք է առաջադրվել ՀՀ ՔՕ 131-րդ հոդվածի (Մարդուն առեւանգելը) 2-րդ մասի 1-ին կետով:
Հիշեցնենք, որ նշված քրեական գործի շրջանակներում մեղադրանք է առաջադրվել եւս 5 անձի: