Վազգեն Մանուկյանը Գետաշենը հանձնելու հետ ի՞նչ կապ ունի, Տեր-Պետրոսյանն այն վաճառեց. ես Մոնթեի «աջ թևն» էի, ինչո՞ւ խփեցին Մոնթեին, Վազգենին՝ ծրագիր էր. պատերազմների մասնակից (տեսանյութ)
Արցախյան առաջին պատերազմի մասնակից Մովսես Մելյանին հանդիպեցինք Գիտությունների ազգային ակադեմիայի բակում, դեկտեմբերի 9-ին կայացած հանրահավաքի ժամանակ: Նա ՀՅԴ անդամ Գեղամ Մանուկյանին համոզում էր, որ թույլ տան իրեն ելույթ ունենալ հանրահավաքում: Մանուկյանն իր հերթին ասում էր, որ իրենց համար սկզբունք է՝ համազգեստով որևէ մեկը չպետք է ելույթ ունենա:
Մելյանին խնդրեցինք, որ իր ասելիքը լսարանին փոխանցի NEWSPRESS.am-ի միջոցով:
Նա պատմեց, որ վերջին պատերազմում վիրավորվել է Շուշիում նոյեմբերի 6-ին (ի դեպ, նրա ձեռք ը կապված էր-հեղ.):
«Ուզում եմ ասել, որ Նիկոլ Փաշինյանը ոչ թե հողը հանձնել է, այլ ինքը մեր նման տղաների արյունը, զոհվածների արյունը վաճառեց: Լուկաշենկոյի ասած 5 միլիարդն ինքը վերցրել է ու ծախել է մեր արյունը»,- խոսքն այսպես սկսեց Մելյանը:
Մեր հարցին, թե ինչո՞ւ է այդ կարծիքին, ազատամարտիկն ասաց, որ հենց էնպես չեն վերցնում ու հող հանձնում: «Իմ կարծիքն էն ա, որ ինքը վաճառել ա մեր արյունը, մեր ընկերների դիակները վաճառել ա, որ այսօր ասում են՝ գնանք մերոնց դիակները բերենք, մեր գերիներին բերենք, ինքը տեղաշարժում չի անում, ոչինչ չի անում»,- ասաց մեր զրուցակիցը:
Նա նշեց, որ ինքը պատերազմի ժամանակ եղել է Շուշիի խաչմերուկից 300 մետր դեպի Ստեփանակերտ ու ներկայացրեց իրավիճակը տեղում. «Եթե մենք 1-2 օր էլ ձգեինք, մենք Շուշին կվերցնեինք: Խնդիրն այն էր, որ մենք չունեինք կարգին զենք-զինամթերք, որ կարողանայինք կռվել, որովհետև Փաշինյանների նմանները ասում են՝ 30 տարի կերել են, 2 տարում 30 տարվա կերածը դու անցել ես»,- դիմելով վարչապետին՝ ասաց նա:
Մասնավորապես, նշեց, որ նոյեմբերի 3-4-ին, մինչև կիջնեին «Քաչալ սար» կոչվող հատվածից, թուրքի ինքնաթիռն իրենց վրայով անցել է, հասել Ստեփանակերտ, հարվածներ հասցրել ու վերադարձել, իսկ իրենք զենք չեն ունեցել ինքնաթիռին հարվածելու համար, միայն ինքնաձիգներ են ունեցել:
Անդրադառնալով զորքի քանակին՝ մեր զրուցակիցն ասաց, որ շատ բան ասել չի կարող, միայն մի դեպք պատմեց. «Տեղ գյուղում հանդիպեցի մի շարք զինվորների, ովքեր զենքը շպրտել, գնացել էին: Էսօր էդ մարդիկ Փաշինյանի կողքը կանգնած են: Էն մարդիկ են, որ հայտարարում են Ջաբրայիլը Քարվաճառի... Դու սկի չգիտես Քարվաճառը որտեղ ա, Ջաբրաիլը որտեղ ա, ի՞նչ ես ֆորմա հագել ու սուտ բաներ խոսում»:
Խոսելով ընդդիմության միասնական թեկնածուի՝ Վազգեն Մանուկյանի մասին, մեր զրուցակիցն ասաց, որ նրան ճանաչում է իր կռվելու տարիներից: «Նա եղել է մեր Պաշտպանության նախարարը: Հոյակապ նախարար է եղել: Եթե այսօր նա լիներ Պաշտպանության նախարար կամ վարչապետ, մենք այս օրին չէինք լինի»:
Հարցինք, թե ինքը՝ որպես պատերազմի մասնակից, ի՞նչ տեղեկություններ ունի Գետաշենի հետ կապված, քանի որ համացանցում ակտիվորեն տարածվում է նախկին վարչապետ Անդրանիկ Մարգարյանի մասնակցությամբ տեսանյութը, որտեղ Մարգարյանն ասում է, որ Գետաշենը հանձնել է Վազգեն Մանուկյանը: Ի պատասխան՝ ազատամարտիկն ասաց. «Պարոն Մանուկյանը Գետաշենի հետ ի՞նչ կապ ունի: Ճիշտ է՝ Պաշտպանության նախարարն էր, բայց վաճառողն ո՞վ էր՝ նույն Լևոն Տեր-Պետրոսյանը: Վաճառվեց: Նա էլ վաճառվեց: Այս ծրագիրն էլ է Լևոն Տեր-Պետրոսյանի ծրագրերից: Սա՝ պարոն Նիկոլ Փաշինյանը, Լևոն Տեր -Պետրոսյանի ճուտն ա, սա Տեր-Պետրոսյանի ծրագիրն ա՝ Մեղրիից տալ, որպեսզի ճանապարհ բացեն Ադրբեջան-Նախիջևան»:
Մելյանը նաև մի շարք հարցեր ուղղեց. «Վազգեն Սարգսյանին ինչո՞ւ խփեցին, Մոնթե Մելքոնյանին ինչո՞ւ խփեցին»,- հարցրեց նա՝ ընդգծելով, որ ինքը Մոնթե Մելքոնյանի «աջ թևն էր»:
«Իրենք իրենց ուզած ծրագրին հասնելու համար պետք է 3-4-րդ մարդուն վերացնեին՝ Վազգեն Սարգսյանին, Կարեն Դեմիրճյանին, Մոնթե Մելքոնյանին: Ինչո՞ւ Անդրանիկ Մարգարյանը մահացավ»,- հարցրեց նա ու ինքն էլ պատասխանեց հարցերին:
Մանրամասները՝ տեսանյութում