«Հայաստանն արժանի է այնպիսի պետական իշխանության, որն ի վիճակի է լուծել իր հիմնական խնդիրները». Յակով Քեդմի

Ռուս հասարակական գործիչ Վլադիմիր Սոլովյովն իր յութուբյան ալիքում հեռարձակվող Полный контакт հաղորդման շրջանակներում հեռավար ձևաչափով հյուրընկալել է իսրայելցի դիվանագետ, քաղաքական վերլուծաբան Յակով Քեդմիին, որը մի շարք զուգահեռներ է անցկացրել Հայաստանի և Իսրայելի միջև, հայտնում է Tert.am-ը:

Սոլովյովի հարցին այն մասին, թե ինչու Հայաստանը չի կարողանում գնալ Իսրայելի ճանապարհով և ստեղծել բարգավաճող պետություն, տնտեսություն և հասարակություն, Քեդմին պատասխանել է.«Հավանաբար հարցը նրանում է, որ հայերը հրեաներ չեն և մենք էլ հայ չենք: Ժողովուրդը այլ իրավիճակում է գտնվում, ոչ այնպիսի իրավիճակում, որը ցանկալի կլիներ հայ ժողովրդի համար: Այն, որ Հայաստանում ավելի քիչ հայ է ապրում, քան արտասահմանում, դա փաստ է: Սակայն հայ ժողովրդի մեջ չկա այդպիսի հասկացողություն, ինչպիսին է օրինակ հրեաների համար «վերադարձ դեպի Իսրայելը»: Հայկական պետությունը ստեղծվել է, բայց այն չի դարձել մագնիս, որը կձգեր աշխարհի բոլոր հայերին և կդրդեր վերադառնալ հայրենիք` փորձելով դրան տալ ամեն ինչ, ինչ իրենք ունեն: Ես նկատի ունեմ անձնական ինտելեկտուալ ներուժը, որը նրանք ունեին, և որը այլ երկրներում ապրելու արդյունք է: Դա հիմնական պատճառն է, որովհետև եթե այսօր նայենք Իսրայելին, ապա այստեղ այսօր արդեն 9 միլիոն մարդ կա և սա աշխարհի ամենամեծ հրեական բնակավայրն է: Դրանք մարդիկ են, որ վերադարձել են այլ երկրներից, սակայն Հայաստանում, ցավոք, նման բան չկա»,-ասել է Քեդմին:

Որպես մեկ այլ պատճառ դիվանագետը նշել է ներկա միջազգային իրավիճակը:

«Մեկ այլ պատճառ էլ միջազգային իրավիճակն է: Մենք դա ավելի արդյունավետ ենք օգտագործել: Երբ պահ է եկել, երբ որոշում պետք է ընդունեինք, մենք դա արել ենք: Հայաստանում դա չկա»,-նշել է Քեդմին:

Խոսելով ՀՀ 3-րդ հանրապետության մասին դիվանագետը ասել է. «Անկախացումից հետո Հայաստանը չի կարողացել ստեղծել այն արժեքները, որոնք անհրաժեշտ էին և այսօր էլ անհրաժեշտ են հայ ժողովրդին: Այն բոլոր հայերը, որոնց մենք գիտենք և որոնք փառքի են հասցրել Հայաստանը, նրանցից գրեթե ոչ ոք չի ապրել և չի ապրում Հայաստանում: Հայաստանը այսօր քաղում է պետության ներքին թուլության պտուղները: Հայաստանն արժանի է այնպիսի պետական իշխանության, որն ի վիճակի է լուծել իր հիմնական խնդիրները: Մեզ մոտ էլ իշխանության քննադատություն կա, բայց ամեն դեպքում, հիմնական խնդիրները լուծվել և լուծվում են: Հայաստանը այսօր դրան ընդունակ չէ: Ոչ նրա համար, որ հայ ժողովուրդը ունակ չէ, այլ պարզապես Հայաստանի բնակչությունը ժամանակ առ ժամանակ ընկնում է թակարդը` չգտնելով ժողովրդի և պետության զարգացման ճիշտ ուղին: Մենք դա արել ենք, դրանում է հիմնական խնդիրը»,-ասել է Քեդմին:

«Ինչ վերաբերում է քաղաքականությանը, ապա հայկական իշխանությունը պետք է կարողանա ժամանակին խելացի փոխզիջումների գնալ: Իսկ նա շատ ժամանակ հրաժարվում է և հակառակն է անում: Սակայն այսօր Հայաստանում իրավիճակը այնպիսին է, որ այն կարող է կանգնել նոր զարգացման ուղու վրա: Եթե նրանք դա ճիշտ օգտագործեն, նրանք կարող են ուղղել անցյալի սխալները: Անդրկովկասում հայ ժողովրդի իրավիճակը այնպիսին է, որ մի կողմից իրեն չսիրող Թուրքիան է, մյուս կողմից ոչ բարեկամ Ադրբեջանը: Վրաստանի մասին չեմ խոսում, խորհրդային շրջանից հետո հայ և վրացի ժողովուրդների միջև մեծ սեր չի եղել: Ճիշտ մարդու առկայությունը կարևոր պաշտոնում, որը կարևոր պահին կարող է ընդունել միակ ճիշտ որոշումը, կարող է մեծ դեր խաղալ: Հայաստանը այսօր շատ ավելի լավ վիճակում է, քան եղել է պատմության որոշ ժամանակներում, բայց ոչ այնպիսի վիճակում, որում նա պետք է և կարող էր լինել: Այսօր նրանց ձեռքում է ամեն ինչ, պետք է սկսել խելացի և իմաստուն զարգացման ճանապարհ: Հայ ժողովուրդը ունի իր տաղանդները, հարցն այն է, որ նրանք պետք է բացահայտվեն»,-եզրափակել է Քեդմին: