Ֆոսֆորային զենքից տուժածների համար նախատեսված հետայրվածքային բինտերի համար մաքսազերծում են պահանջում․ «Հրապարակ»
Ֆրանսիայից Հայաստան այրվածքներ ունեցող անձանց ուղարկված հումանիտար բեռը, որն ուղարկվել է բարեգործական նպատակով, շահառուներին չի հասնում, քանի որ մաքսատունը մաքսազերծման համար պահանջում է շուրջ 130 հազար դրամ։ Մինչ օգնությունը ստանալու համար բյուրոկրատական քաշքշուկը շարունակվում է, շահառուները, որոնց համար նախատեսված է բեռը, կարող են մահանալ։
Այս մասին «Հրապարակ»-ին հայտնեց «Բժիշկների կատարելագործման միջազգային ակադեմիա» հասարակական կազմակերպությունից Դիաննան՝ ավելացնելով․ «Ես անընդհատ ծախսերով եմ աշխատում և ավել գումար չունեմ, որ տամ «ռաստամոժկա» անեմ»։
ՀԿ-ի ներկայացուցիչը վերադառնում էր մաքսատան կարգոյից։
Վերջինիս խոսքով՝ «գումարը պահանջում են՝ «ճանապարհածախս» , ընդհանուր ծախսեր, բայց ահավոր տգեղ է, էլի։ Նշեմ, որ այդ բեռում կան հետայրվածքային դիմակներ, հետայրվածքային բինտեր ֆոսֆորային զենքերի հետևանքները վերացնելու նպատակով։ Հետայրվածքային դիմակներ»։
«Հրապարակ» ը խոսեց նաև ՊԵԿ փոխնախագահ Շուշանիկ Ներսիսյանի հետ, որը հայտնեց․
«Ընթացակարգը հետևյալն է․ հարկերից ազատման երկու տարբերակ կա․ մեկն այն է, որ եթե աշխատում են ԱՆ-ի հետ, ինքը հրաժարվում է հօգուտ Առողջապահության նախարարության։ Երկրորդ տարբերակը՝ եթե իրենք հասարակական կազմակերպություն են, դիմում են կառավարություն՝ Բարեգործական հանձնաժողովին, մենք արագացրել ենք ընթացակարգը, մեկ-երկու օրվա ընթացքում բեռը որակվում է որպես բարեգործական և իրենք կարողանում են տնօրինել։ Եթե այդ 2 տարբերակնեից որևէ մեկով անհատը կամ կազմակերպությունը չի ուզում գնալ, այո, ապրանքը ենթակա է մաքսազերծման։ Բայց մենք այդ երկու տարբերակը հատուկ մշակել ենք, որ հարկերից ազատվեն»։
Մանրամասները՝ սկզբնաղբյուրում։