30 տարի հայկական կողմը համարել է, որ Լաչինի ամբողջ շրջանը պետք է որպես միջանցք իրենց տրվի․ Ալիև
Հայտարարության սկզբնական տարբերակում մեզ առաջարկվում էր, որպեսզի Լաչինի միջանցքի լայնությունը 30 կիլոմետր լինի: Այս մասին ժողովրդին ուղղված իր ուղերձում հայտարարել է Ադրբեջանի նախագահ Իլհամ Ալիևը։ Այս մասին գրում է Moscow-baku.ru-ն:
«Ես կտրականապես դեմ էի դրան և ասացի, որ հայկական կողմի այս նկրտումները բացարձակապես անհիմն են: Միջանցքի շրջանակներում անվտանգության միջոցառումների ապահովման համար այդպիսի լայն միջանցքի կարիք չկա: Ուստի ես դա բացարձակապես անընդունելի առաջարկ համարեցի և արտահայտեցի իմ կարծիքը: Այնուհետև երկրորդ տարբերակում նախատեսվում էր, որ Լաչինի միջանցքի լայնությունը 10 կիլոմետր կկազմի: Ես դրան ևս համաձայնություն չտվեցի, և արդյունքում համաձայնություն ձեռք բերվեց 5 կիլոմետր լայնությամբ միջանցքի շուրջ: 5 կիլոմետր լայնությամբ միջանցքը բավարար հեռավորություն է ընդգրկում և՛ մեր, և՛ Լեռնային Ղարաբաղում բնակվող հայերի, ե՛ւ անվտանգության ապահովման համար»,- ասել է նա:
Ալիևը նաև նշել է, որ երկար` շուրջ 30 տարի տևած բանակցություններում Լաչինի շրջանն Ադրբեջանին վերադարձնելու հարցը, հատկապես` Լաչինի միջանցքի հետ կապված հարցը միշտ քննարկվել է որպես շատ կարևոր և առանձին թեմա. «Հայկական կողմն ընդհանրապես համարում էր, որ ամբողջ Լաչինի տարածքը պետք է որպես միջանցք իրենց տրվի: Ցավոք, որոշ արևմտյան շրջանակներ կողմ հանդես եկան այս դիրքորոշմանը: Իսկ Լաչինի շրջանը շատ լուրջ վերահսկողության տակ վերցվեց Հայաստանի կողմից և այնտեղ բնակեցման մեծ ծրագիր իրականացվեց: Այնտեղ հազարավոր մարդիկ էին ապրում:
Ըստ որոշ տվյալների` այնտեղ, հնարավոր է, շուրջ 10 հազար մարդ էր ապրում: Այսինքն` Հայաստանի ղեկավարությունը չէր էլ մտածում Լաչինի շրջանը վերադարձնել Ադրբեջանին: Երբ բանակցությունների ընթացքում մենք շոշափում էինք Լաչինի միջանցքին վերաբերող թեմաները, ե՛ւ Հայաստանը, ե՛ւ նրա հովանավորները միշտ նշում էին, որ, ոչ, Լաչինի շրջանն առանձին թեմա է: Չնայած մեզ ուղիղ կերպով չէր էլ ասվում, բայց միշտ այնպիսի կարծիք է եղել, որ Լաչինի շրջանը ինչ-որ ձևով պետք է մնա Հայաստանին»: