Փաշինյանը լավ գիտեր, որ ոչ ոք նրան չէր պատրաստվում սպանել, նրա նպատակը խղճահարություն առաջացնելն էր․ Վանեցյան
Այսօր հասարակությունում վիշտ, սուգ ու անհասկանալի վիճակ է։ Այս մասին ասաց «Հայրենիք» կուսակցության նախագահ Արթուր Վանեցյանը՝ անդրադառնալով Փաշինյանի այն հայտարարությանը, թե հասարակությունը չողջունեց Նիկոլ Փաշինյանի հրաժարականի վերաբերյալ ընդդիմության պահանջը։
«Միգուցե շատ կոպիտ հնչի, բայց Փաշինյանի այս հայտարարությունը սրիկայություն է, սրիկայությունն այլ կերպ չի լինում, այն այլ տեսք չունի։ Օր առաջ, վայրկյան առաջ իշխանության մեջ գտնվողները պետք է քայլեր ձեռնարկեն անհետ կորածների ճակատագիրը պարզելու, գերեվարվածներին վերադարձնելու ուղղությամբ։ Շատ պարզ է, մարդիկ սգում են, չեն ցանկանում մասնակցել քաղաքական գործընթացի, բայց ես հայտարարել եմ, սա զուտ քաղաքական գործընթաց չէ, սա պայքար է՝ հանուն հայրենիքի փրկության»,-հայտարարեց Արթուր Վանեցյանը և հավելեց․ «Ի պատասխան Փաշինյանի ցինիկ հայտարարության՝ կոչ եմ անում մարդկանց դուրս գալ տներից ու մասնակցել Փաշինյանի հրաժարականի պահանջով անցկացվող հավաքներին»։
Ըստ նրա՝ սա հերթական սև ու սպիտակի բաժանումն է, և այն պահանջը, թե Դատախազությունը և մնացյալ համապատասխան մարմինները պետք է պատասխանատվության ենթարկեն Փաշինյանին, այսօր հնարավոր չէ, քանի որ նոր և նախկին բաժանումը դեռ կա, և Փաշինյանը դուրս է գալու՝ նախկիններին մեղադրելով հասարակությանը մանիպուլացնելու, իսկ հասարակությունը հավատալու է:
«Նիկոլը մարդկանց հոգեբանության մեջ մտել է խղճի զգացում առաջացնելով, ինքը մեղք է, միշտ մեղք է: Որ ասում էր՝ պատրաստվում էին ինձ սպանել, ինքը շատ լավ գիտեր, որ ոչ ոք նրան չէր պատրաստվում սպանել, այսինքն՝ նպատակը խղճահարություն առաջացնելն էր»,-ասաց նա: