Այս պահի տվյալներով Ադրբեջանում կա 17 հայ ռազմագերի. ՔԿ պաշտոնյա
Հայկական կողմն այս պահի դրությամբ ունի 17 զինծառայող, ովքեր գտնվում են Ադրբեջանում։ Լրագրողների հետ հանդիպման ժամանակ ասաց ՀՀ Քննչական կոմիտեի քրեագիտական վարչության պետ Ռաֆայել Վարդանյանը։ Նա տեղեկացրեց, որ հնարավոր է կան ևս 2 ռազմագերի, սակայն այդ 2֊ի մասով տվյալները դեռևս ճշտված չեն։
«17 զինծառայողի տվյալները ճշտված են, երկուսի մասով տվյալները ճշտվում են, հաստատապես ոչինչ չասենք։ Աշխատում ենք ՄԻԵԴ-ում հայաստանյան ներկայացուցչության և պաշտպանության նախարարության ռազմագերիների միջգերատեսչական հանձնաժողովի հետ հայ զինծառայողների նկատմամբ հրատապ միջոցներ կիրառելու համար։ ՄԻԵԴ-ում հայաստանյան ներկայացուցչության, առանձին իրավապաշտպաների կողմից ներկայացվել են դիմումներ, մի մասը բավարավել են, մի մասը գտնվում է ընթացքի մեջ, քննարկման փուլում», - ասաց նա:
Ինչ վերաբերում է ադրբեջանցի ռազմագերիներին, ապա նա հստակ չնշել, թե քանի ռազմագերի կա, պարզապես նկատեց, որ այս պահի դրությամբ հայկական կողմ ունի ադրբեջանական կողմից հարցաքննված 2 ռազմագերի:
Նրանք հարցաքննվել են քրեական գործի շրջանակներում, նրանց մասնակցությամբ իրականացվել են քննչական, այլ դատավարական գործողություններ։
«Նրանք պահվում են միջազգային բոլոր մարդասիրական իրավունքի նորմերի պահպանմամբ, ամենաբարձր մակարդակով ստանում են համապատասխան բժշկական օգնություն, երեք անգամյա սնունդ և մնացած բոլոր պահանջներն ապահովված են։
Նույնիսկ հարցաքննության ընթացքում նրանցից մեկը նշեց, թե Ադրբեջանում իրեն դժվար թե սրանից ավելի լավ վերաբերմունքի արժանացնեին», - նշեց նա` հավելելով, որ մյուսների մասով ավելի տվյալներ կներկայացնեն պարբերաբար, եթե ՊՆ-ից ստանան տվյալներ: