«Դակումենտի համար եկել են Հայաստան ու պլեն մնացել. 6-7 հազար մարդ ուզում է ՌԴ մեկնել». քաղաքացիները կառավարության դիմաց են (Տեսանյութ)

«Պետք է հստակ պատասխան տան, եթե ասեն չեն բացում՝ կիմանանք ինչ անենք։ Բոլորն ուզում են գնան իրենց աշխատանքին, դպրոցը, մանկապարտեզը։ Ով դիմել է, ասում են՝ սպասեք տեսնենք ինչ է լինում։ Թե կարանտինային ինչ պայմաններ են, իրենք կիմանան, անհայտ է ոնց է լինելու»։

Այս մասին լրագրողների հետ զրույցում ասացին քաղաքացիներ, ովքեր չեն կարողանում Ռուսաստան մեկնել։ Նրանք հարցի շուրջ սպառիչ պատասխան ակնկալելով` եկել էին կառավարություն։

«Իմ բնագավառի գործը Հայաստանում չի լինի, իմ կլիենտուրան, գործը դրսումա, տնեցիներս էնտեղ են։ Վիճակ չկա, ժողովուրդը պետք ա ձայնը բարձրացնի, ղեկավարությունը դա լսելի պետք է դարձնի, հաշվի նստի ժողովրդի հետ։ Տարբեր խմբեր եկել են այստեղ պայքարելու, հույսները կտրել են, պետք է պայքարենք, որ հարցը լուծեն։

Կեսը դուրս են քնում, կեսը բարեկամի տունը, կեսի ընտանիքը դուրսն է։ Ես հասկացել եմ, որ արտակարգ դրության չեղարկումից հետո սահմանափակումները՝ ելքի մուտքի, մնալու է։ Հստակեցում չկա, ինչ կետերով է արտակարգ դրությունը հանվելու»,-ասաց քաղաքացիներից մեկը։

Հավաքվածները ֆեյսբուքի խումբ ունեն, որտեղ1980 հոգի մարդ կա: Նրանցից յուրաքանչյուրը էլ իր ընտանիքն ունի։ Հաշվել են` 6-7 հազար մարդ ուզում է գնալ։

«Ոչ մի լուծում չի եղել, չարտերային թռիչքներ ա, շատ բաներ հաշվի չեն առնում։ Թող ասեն Ռուսաստանի հետ էս հարաբերություններն է, հիմա հնարավոր չէ բացել, ձեր գլխի ճարը տեսեք մի կերպ ապրեք, մինչեւ լուծեք։ Մարդկանց ասեն էս վիճակն ա, կգնան մի բան կմտածեն, վարկերը չեն կարողանում մուծեն, գործը էնտեղ ա, պետք է աշխատեն փող ուղարկեն։ Սեւ ցուցակ ես ընկնում, որ հացի փող չունենաս, բանկից փող չես կարա վերցնես հաց առնես։ Դրանից վատ վիճակ լինո՞ւմ ա», - ասաց ցուցարարներից մեկը։

Նրանցից շատերն էլ նշեցին, որ մարդիկ փաստաթղթերի համար Հայաստան են եկել ու կրակն ընկել։

«Օրինակ դակումենտի համար եկել են Հայաստան ու պլեն մնացել` ամենաբուն իմաստով։ Մարդ կա երեխայի հետ էստեղ է, բայց ամուսինն էնտեղ է։ Դուրս է գալիս 5-6 ամիս իրարից բաժանել են։ Բա էս մարդիկ ո՞ւմ դիմեն»։