Խախտումներ են արձանագրել «Գնունի» շինանյութերի տոնավաճառում
ՀՀ բնապահպանության և ընդերքի տեսչական մարմնի Շիրակի տարածքային բաժնի աշխատակիցները ոստիկանների ուղեկցությամբ այսօր հերթական վերահսկողական միջոցառումն իրականացրել են ՀՀ Շիրակի մարզի Գյումրի քաղաքի «Կումայրի» պետական պատմաճարտարապետական արգելոց-թանգարանի տարածքում։ Այս մասին հայտնում են կառավարությունից:
Վաղ առավոտից թատրոնների, թանգարանների, կինոթատրոնների, եկեղեցիների, հուշարձանների հարակից տարածքների, տեսարժան վայրերի լայնածավալ դիտարկումների արդյունքում էական խախտումներ չեն արձանագրվել։
Ճեմուղիներում զբոսնող գյումրեցիներն ու քաղաքի հյուրերը դիմակները կրել են ճիշտ, գիտակցաբար մոտենալով համաճարակի կանխարգելման անվտանգության կանոններին՝ պատմական և մշակութային գրավչության օբյեկտներում մարդկային կուտակումներ և հերթեր չեն առաջացրել։
Լայնամասշտաբ մշտադիտարկումների ընթացքում կազմվել է վարչական իրավախախտումների մասին 2 արձանագրություն։ Այս ցուցանիշը փաստում է, որ Տեսչական մարմնի կողմից կատարվող ամենօրյա վերահսկողական և իրազեկման աշխատանքների արդյունքում խախտումների և թերությունների թվաքնակը շարունակում է կրճատվել։
Պարետատան կողմից սահմանված հակահամաճարակային կանոնների պահպանմանն ուղղված ԲԸՏՄ անակնկալ ստուգայցերը լինելու են ամենօրյա և ընդգրկելու են հանրապետության ամբողջ տարածքը։
ՀՀ քաղաքաշինության, տեխնիկական և հրդեհային անվտանգության տեսչական մարմնի մասնագետներն էլ ՀՀ Ճանապարհային ոստիկանության աշխատակիցների հետ համատեղ շարունակել են լայնածավալ մշտադիտարկում և վերահսկողություն իրականացնել Շիրակի մարզում գործող հանրային տրանսպորտում՝ ՀՀ պարետի կողմից ամրագրված անվտանգության կանոնների պահպանման նկատմամբ։
Վաղ առավոտից իրականացված դիտարկումների արդյունքում կանոնավոր և ոչ կանոնավոր ուղևորափոխադրումներ իրականացնող միջմարզային, ներմարզային երթուղիները սպասարկող տրանսպորտային միջոցներում լուրջ խախտումներ չեն հայտնաբերվել։ ՏՄ մասնագետների կողմից կանոնավոր երթուղիներում շահագործվող տրանսպորտային միջոցներում հայտնաբերված մի շարք թերությունների համար տրվել են պարտադիր կատարման ցուցումներ, մասնավորապես, ախտահանիչ նյութերի պատշաճ որակի ապահովման և դիմակների ճիշտ կրման վերաբերյալ:
Մարդատար տաքսի ավտոմոբիլներում հայտնաբերվել են միայն դիմացի նստատեղին ուղևորի առկայությամբ փոխադրում իրականացնելու դեպքեր։
Հայտնաբերված խախտումների դեպքերով կազմվել են վարչական իրավախախտման վերաբերյալ արձանագրություններ, ինչպես նաև ՔՏՀԱ տեսչական մարմնի Շիրակի տարածքային բաժնի մասնագետների կողմից տեղում կատարվել են իրազեկման և բացատրական աշխատանքներ։
Տեսչական մարմնի կողմից վերահսկողական գործառույթները շարունակվում են ՀՀ ամբողջ տարածքում։
ՀՀ շուկայի վերահսկողության տեսչական մարմինը մշտադիտարկում է իրականացրել նաև Գյումրի քաղաքում և Երևան քաղաքի Կենտրոն վարչական շրջանում: Գյումրիում տեղի ունեցած կրկնայցերի ընթացքում տեսչական մարմնի աշխատակիցները խախտումներ չեն հայտնաբերել:
Երևանի կենտրոն վարչական շրջանի «Տաշիր» առևտրի կենտրոնի ոսկու շուկայում ՇՎՏՄ-ի մշտադիտարկում իրականացնող խումբը դիտարկել է թերություններ կապված ջերմաչափման գրանցամատյանների հետ, որոնք տեղում շտկվել են:
Տեսչական մարմնի աշխատակիցները խախտումներ են արձանագրել «Գնունի» շինանյութերի տոնավաճառում: Բացակայել են ջերմաչափերը և ջերմաչափման գրանցամատյանները, դիմակների ու ձեռնոցների համար նախատեսված հատուկ փակ աղբամանները: Խախտումների վերաբերյալ կազմվում են արձանագրություններ, որոնք ուղարկվում են պարետատուն:
ՀՀ ողջ տարածքում տեսչական մարմնի կողմից իրականացվող մշտադիտարկման գործընթացը շարունակվում է:
Հոլիսի 21-ին ՇՎՏՄ-ն նաև կասեցումներ է իրականացրել Երևան խաղաքի Արաբկիր և Նոր Նորք վարչական շրջաններում: 24 ժամով կասեցվել է շինանյութի առևտրի մի շարք կետերի գործունեությունը, որտեղ բացակայել են սոցիալական հեռավորություն պահելու նպատակով արվող գծանշումները, ջերմաչափերը և ջերմաչափման գրանցամատյանները:
Շուկայի վերահսկողության տեսչական մարմինը պարետի՝ մայիսի 3-ի N63 որոշման համաձայն՝ շարունակում է մշտադիտարկում իրականացնել առևտրի կենտրոններում, տոնավաճառներում, շինարարական խանութներում, հեղուկ վառելիքի, սեղմված բնական կամ հեղուկացված նավթային գազերի մանրածախ առևտրի կետերում: