Գագիկ Ջհանգիրյանը համապատասխանում է ՍԴ դատավորի համար եղած պահանջներին. Նիկոլայ Բաղդասարյան
ԱԺ «Իմ քայլը» խմբակցության պատգամավոր Նիկոլայ Բաղդասարյանը վստահեցնում է՝ Սահմանադրությամբ ամրագրվել է, որ ՍԴ դատավորներից երեքի պաշտոնավարման ժամկետները սպառվել են, և Սահմանադրության փոփոխությունների հիմնավորմամբ ամեն բան ներկայացված է։ Իսկ թե կոնկրետ որ դատավորների լիազորությունները պետք է դադարեցվեն՝ արդեն որոշել են իրենք՝ իմքայլական պատգամավորները։
Նիկոլայ Բաղդասարյանի խոսքով, խնդիր չի կարող առաջացնել այն համգամանքը, որ ՍԴ նախագահ Հրայր Թովմասյանը արձակուրդում էր, երբ սահմանադրական փոփոխությունների նախագիծն ուժի մեջ մտավ, քանի որ, նրա խոսքով, Հրայր Թովմասյանի լիազորությունները որպես ՍԴ նախագահ դադարում են։
«Մենք կողմ ենք քվեարկել մի փաստաթղթի, որում արձանագրված է՝ Հրայր Թովմասյանը որպես ՍԴ նախագահ դադարում է լիազորություններ ունենալ։ Նշված է նաև, որ Ալվինա Գյուլումյանի լիազորություններն են դադարում՝ որպես ՍԴ դատավոր»,- նշեց Բաղդասարյանը։
Ինչ վերաբերվում է Վենետիկի հանձնաժողովի նախագահի նամակին, որն ուղղված էր Հրայր Թովմասյանին, ապա պատգամավորը վստահեցնում է, որ ԶԼՄ-ները սխալ էին թարգմանել Ջ. Բուքիքյոյի նամակը.
«Նա ասել էր, որ իրենց առաջարկություններն ամբողջությամբ չեն ընդունվել, իսկ մամուլում նշված էր՝ իրենց հանձնարարությունները չեն ընդունվել։ Տվյալ կառույցը խորհրդատվական բնույթ ունի, և բազմաթիվ պետություններ ամբողջությամբ չեն ընդունում Վենետիկի հանձնաժողովի առաջարկությունները»,-ասաց Բաղդասարյանը։
Հարցին, որ որպես ՍԴ անդամ՝ Գագիկ Ջհանգիրյանի թեկնածության մասին է գրում մամուլը, արդյո՞ք նա համապատասխանում է այդ պաշտոնին, Նիկոլայ Բաղդասարյանը պատասխանեց.
«Տարիքային ցենզ կա, որ պետք է 40 և բարձր տարիք ունենա ՍԴ անդամը, նա համապատասխանում է այդ պահանջին։ Նա նաև ունի բարձրագույն կրթություն, այսինքն՝ համապատասխանում է պահանջներին, այլ հարց է՝ նրան կառաջադրե՞ն, թե՞՝ ոչ։ Նորմալ է, որ մարդկանց լիազորությունները դադարում են, և նրանց փոխարեն նոր մարդկանց են բերում»,- ասաց Բաղդասարյանը։