Ո՞ւմ թողտվությամբ նախկին դատավոր Ուզունյանը հեռացավ Հայաստանից. նա ուղիներ է փնտրում, որ իր համար «բարեխոսեն» նոր ոստիկանապետին (ֆոտո)
Նախորդ տարեվերջին՝ դեկտեմբերի 23-ին, համացանցում տեղեկություն տարածվեց այն մասին, որ Հայաստանը լքել է կաշառառության մեջ մեղադրվող նախկին դատավոր Սամվել Ուզունյանը: Հիշեցենք, որ նախկին դատավոր Ուզունյանը մեղադրվում էր շուրջ 51 հազար դոլարի կաշառք ստանալու մեջ։ Դատախազությունը հայտնել էր, որ Ուզունյանը 2007-ին, ապա և 2014-ին, քաղաքացիներից պահանջել և տարբեր ժամանակահատվածներում ստացել է առանձնապես խոշոր չափերով կաշառք, մի դեպքում 13 հազար, մյուս դեպքում՝ 38 հազար դոլար։ Եվ ահա օրեր առաջ հայտնի դարձավ, որ Սամվել Ուզունյանի վերաբերյալ քրեական գործը կասեցվել է` մեղադրյալի գտնվելու վայրը հայտնի չլինելու հիմքով։
Սամվել Ուզունյանը
Նշված գործին միացվել էր Ուզունյանի՝ Հայաստանը լքելու գործը, որով և քննվում էր, թե ում մեղքով է նախկին դատավորը լքել Հայաստանը։
Եվ ահա, NEWSPRESS.am-ը տեղեկություններ է ստացվել այն մասին, որ Ուզունյանի հեռացումը Հայաստանից իրականացվել է «Զվարթնոց» օդանավակայանի գծային բաժնի պետ, ոստիկանության փոխգնդապետ Լաերտ Խաչատրյանի հովանավորությամբ:
Խաչատրյանը ժամանակին եղել է «Զվարթնոց» օդանավակայանի գծային բաժնի ավագ օպերլիազոր, այնուհետև Ճանապարհային ոստիկանության Գյումրիի ստորաբաժանման պետ: Վալերիյ Օսիպյանը նրան հեռացրել էր պաշտոնից:
Եվ ահա 2019-ի հոկտեմբերի 25-ին այդ ժամանակ նորանշանակ ոստիկանապետի ժ/պ Արման Սարգսյանը նրան ինչ-ինչ պատճառներով և ինչ-որ բաների շնորհիվ նշանակեց այդ պատասխանատու պաշտոնում:
Լաերտ Խաչատրյանը
Ընթերցողին հիշեցնենք, որ հենց Խաչատրյանի պաշտոնավարման ընթացքում Հայաստանից, համենայն դեպս ռուսական կողմի պնդմամբ, երկու խմբաքանակ մաքսանենգ ծխախոտ տեղափոխվեց Ռուսաստանի Դաշնություն:
Վորոնեժում կալանված ինքնաթիռը
Մեր տեղեկություններով՝ Խաչատրյանը Երևան քաղաքի վարչության պետ Արմեն Գասպարյանի՝ Գսպոյի և Երևան քաղաքի վարչության քրեական հետախուզության բաժնի պետ Կարեն Գրիգորյանի՝ Մաճաճ Կարենի մտերիմն է:
Արմեն Գասպարյանը
Այժմ արդեն, մեզ հասած տեղեկություններով, Լաերտ Խաչատրյանը զգում է, որ իր աթոռը երերում է, և նոր ոստիկանապետն իրեն կարող է հեռացնել պաշտոնից: Դրա համար նա փորձում է ծանոթ-միջնորդներ փնտրել, որպեսզի կարողանա պահպանել իր համար, բառի բուն իմաստով, այնքա՜ն թանկ աթոռը:
Իսկ նոր ոստիկանապետի մասին մամուլը դեռ միայն դրական բաներ է գրում, և հույս ունենք, որ մեր այս հրապարակումը հիմք կդառնա առնվազն քննության առնելու Խաչատրյանի կասկածելի գործունեությունը: