Քյարամյանը պետք է ազատվի զբաղեցրած պաշտոնից. նա նշանակվել է օրենքի խախտմամբ. իրավաբան
ԱԱԾ տնօրեն նշանակված Արգիշտի Քյարամյանը տնօրենի տեղակալի պաշտոնում նշանակվելու համար պետք է ստանար գնդապետի կոչում, սակայն նա այդ կոչումը չի ունեցել: Այս մասին NEWSPRESS.am-ի ի հետ զրույցում ասաց իրավաբան Ռոբերտ Հայրապետյանը:
Նրա խոսքով՝ ԱԱԾ տնօրենի տեղակալի ու առավել ևս տնօրենի պաշտոնում նշանակվելու համար անձը պետք է համապատասխանի «Ազգային անվտանգության մարմիններում ծառայության մասին» ՀՀ օրենքով սահմանված չափանիշներին, ինչը չի կարելի ասել Քարամյանի դեպքում։
Ռոբերտ Հայրապետյանը մանրամասնում է.
Ըստ «Ազգային անվտանգության մարմիններում ծառայության մասին» ՀՀ օրենքի 19-րդ հոդվածի 2-րդ մասի՝ ԱԱԾ տնօրենի տեղակալ կարող է նշանակվել ազգային անվտանգության մարմինների այն ծառայողը, ով մինչև նշանակումը զբաղեցրել է ազգային անվտանգության մարմինների ծառայողների բարձրագույն խմբի պաշտոն կամ մինչև նշանակումը առնվազն 3 տարի զբաղեցրել է ազգային անվտանգության մարմինների ծառայողների գլխավոր խմբի պաշտոն և ունի գնդապետից ոչ ցածր կոչում:
Նույն օրենքի 6.1-րդ մասի համաձայն էլ նույն պաշտոնում ծառայության կարող են նշանակվել նաև զինված ուժերի, ոստիկանության, փրկարար ծառայության, քրեակատարողական ծառայության մարմինների ծառայողներ, դատախազներ, քննչական կոմիտեում, հատուկ քննչական ծառայությունում ինքնավար պաշտոն զբաղեցնող անձինք (այդ թվում՝ նշված մարմիններում և պաշտոններում նախկինում ծառայած կամ աշխատած անձինք), ինչպես նաև ազգային անվտանգության մարմինների պահեստազորի սպաներ, որոնք բավարարում են տվյալ պաշտոնին նշանակվելու համար ազգային անվտանգության մարմինների ծառայողներին ներկայացվող պահանջները:
«Ըստ էության, Քյարամյանն ԱԱԾ տնօրենի տեղակալի պաշտոնում նշանակվել է հենց 6.1-րդ մասի հիմքով, քանի որ մինչ այդ պաշտոնի նշանակումը նա 12 ժամով նշանակվել էր Քննչական կոմիտեի նախագահի տեղակալ, եթե կարելի է այդպես ասել, քանի որ այդ 12 ժամից 8-ը քնած ենք եղել: Բայց ԱԱԾ տնօրենի տեղակալի համար էլ դարձյալ պետք է ունենա գնդապետի կոչում, եթե այս պարագայում ՀՀ նախագահը կամ վարչապետն առաջնորդվել են 6.1 մասով, ապա նա գոնե պետք է ունենար քննչական մարմնում այնպիսի կոչում, որը կառավարության որոշմամբ հավասարեցված էր ԱԱԾ-ում գնդապետի կոչմանը, սակայն Քյարամյանի՝ նախկինում ունեցած փոխգնդապետի կոչումն, ըստ կառավարության որոշման, հավասարազոր չէ ԱԱԾ-ում շնորհվող գնդապետի կոչմանն, ինչն, ըստ էության, անհնարին է դարձնում Քյարամյանին այդ պաշտոնում նշանակելու հանգամանքը»,- ասաց Հայրապետյանը:
Նրա խոսքով՝ այդ կոչումն ուղղակի չեն շնորհում, դրա համար անհրաժեշտ է համապատասխան իրավական ակտ, իսկ որպեսզի դա մտնի ուժի մեջ, պետք է սահմանված կարգով հրապարկվի:
«ՔԿ-ից ասել են՝ չի ստացել կոչում, նա ունեցել է փոխգնդապետի կոչում: Գնդապետի կոչում վերջինիս շնորհվել է միայն ԱԱԾ տնօրենի տեղակալի պաշտոնում պաշտոնավարման ընթացքում: Դա նշանակում է, որ Քյարամյանը մինչ այդ ԱԱԾ տնօրենի տեղակալի պաշտոնում նշանակվելու համար պարտադիր համարվող կոչում չի ունեցել»,- նշեց իրավաբանը:
Ռոբերտ Հայրապետյանի դիտարկմամբ, Քյարամյանին կոչում շնորհելու պարտադիրության բացակայությունն օրենքի կամայական մեկնաբանության արդյունք է, ինչը խախտում է «Վարչարարության հիմունքների և վարչական վարույթի մասին» ՀՀ օրենքի 7-րդ հոդվածով վարչական մարմինների համար սահմանված կամայականության արգելքի սկզբունքը։
Այս ամենը հաշվի առնելով էլ իրավաբանը նկատում է, որ Քյարամյանն ԱԱԾ տնօրենի տեղակալի պաշտոնում նշանակվել է օրենքի խախտմամբ: Ավելին` նա ԱԱԾ տնօրենի պաշտոնը նույնպես զբաղեցնում է օրենքի խախտմամբ:
«Այս պարագայում, լուծումը և օրենսդրության պահանջը մեկն է՝ Քարամյանը պետք է ազատվի զբաղեցրած պաշտոնից»,- եզրափակեց Ռոբերտ Հայրապետյանը։