Դուք եք գլխավոր դատախազը, բարի եղեք, պարզաբանեք. Տիգրան Ուրիխանյանը՝ Արթուր Դավթյանին
«350 հազար անգամ հարցրել եմ հիմնադրամի հաշվետվությունների հետ ի՞նչ գաղտնի տվյալ պետք է լինի, որտեղ են զինծառայողների սոցապահովության հիմնադրամի գումարները»: ԱԺ-ում 2019 թվականի դատախազության տարեկան հաղորդման ներկայացման ժամանակ այս մասին հարցրեց անկախ պատգամավոր Տիգրան Ուրիխանյանը՝ ՀՀ գլխավոր դատախազ Արթուր Դավթյանին:
Վերջինս համար անհասկանալի թվաց պատգամավորի ձևակերպումը՝ գաղտնի ծախսերի մասին։
«Առկա են գաղտնի և հրապարակման ոչ ենթակա որոշ տվյալներ, որոնք օրենքի ուժով չեն կարող արտացոլվել հաշվետվություններում։ Գաղտնի տվյալները բացառապես մուտքերին են վերաբերում, իսկ որ մուտքերում գաղտնի տվյալներ կլինեն, կարծում եմ, որ Դուք շատ լավ պիտի իմանայիք, որովհետև մենք ունենք այնպիսի աշխատողներ, որոնց տվյալները գաղտնիք են, նրանց քանակը գաղտնիք է, այդ տվյալները չեն կարող հրապարակվել, հետևաբար՝ այդ մուտքերն այստեղ չէին կարող երևալ», - ասաց Դավթյանը՝ հավլելով, որ Ուրիխանյանը հոգաբարձուների խորհրդի անդամ է եղել, իսկ խորհուրդը լայն լիազորություններ ուներ, և պատգամավորն կարող էր պարզաբանումներ ստանալ։
Ուրիխանյանն էլ հակադարձեց. «Դուք եք գլխավոր դատախազը, բարի եղեք, կոռուպցիայի հետ կապված պայքարի առաջամարտության շրջանակներում պարզաբանումներ արեք, ձեր ձեռքն է իշխանությունը, ապարատը, լծակները, ամեն ինչը։ Էլի եմ ասում՝ այս հիմնադրամը գաղտնիություն չպիտի ունենա»,- ասաց պատգամավորը:
Նա հավելեց, որ մուտքերի մասով գաղտնիության մասին չի հարցրել, հարցրել է՝ որտե՞ղ են գումարները: «1.9 մլրդ վարչապետի երկու օր առաջ փոխանցված փաստաթղթից եմ մեջբերում անում, էդ 1.9 մլրդի չափով գաղտնի ծառայողներ ու աշխատողներ ունե՞ք ՀՀ-ում: Չբռնեիք, կառավարությունով ինձ չհանեիք հոգաբարձուների կազմից, որ ես էլ իմ լիազորություններն օգտագործեի: Որտե՞ղ են հիմնադրամի գումարները»,- հարցրեց պատգամավորը: