Փաշինյանը պետք է խախտի լռությունը. Ալիևը դրան է սպասում
Ադրբեջանի նախագահ Իլհամ Ալիևը հերթական անգամ հոխորտացել է ու հայտարարել, թե վերականգնելու է Ադրբեջանի տարածքային ամբողջականությունը և դրա համար կարևոր է իր երկրի ռազմական հզորությունը:
Ալիևը նաև շարունակել է, թե 100 տարի առաջ Ադրբեջանի առաջին ղեկավարները համաձայնվեցին Երևանը թողնել հայերին, բայց դա մեծ սխալ էր և այդ սխալը պետք է ուղղեն այսօրվա ադրբեջանցի երիտասարդները:
Սա ասել է այն Ալիևը, որին Նիկոլ Փաշինյանը համարում է կիրթ և կառուցողական: Ալիևն իր ցանկություններով պատասխանել է Փաշինյանի կողմից իրեն տրված գնահատականներին:
Այն ժամանակ, երբ ՀՀ վարչապետին զգուշացնում էին, թե հակառակորդ երկրի ղեկավարին կառուցողական և կիրթ անվանելով ուղղակիորեն դառնում ես նրանից խաղաղություն աղերսող, իշխանական անմեղսունակներն ու ֆեյքերի բանակները հարձակվում էին այդ պարզ ճշմարտությունները գիտակցողների վրա:
Հետաքրքիր է՝ հիմա ինչ են մտածում նույն անմեղսունակները Ալիևի հոխորտանքների վերաբերյալ և արդյոք կարծում են, որ սրանք կառուցողական մարդու խոսքեր են: Ալիևն այդ հայտարարությունը արել է երեկ ու երեկվանից մինչ այսօր ողջ իշխանությունը կարել է բերանն ու ձայն չի հանում, փոխարենը վայնասուն են կապել Ռոբեր Քոչարյանի գործով ՄԻԵԴ-ից ստացված կարծիքի հետ կապված: Լուռ է ոչ միայն Փաշինյանը, այլ նաև Արտաքին գործերի նախարարությունը: Ալիևին պատասխանել է միայն Արցախի նորընտիր նախագահ Արայիկ Հարությունյանը. «Այսինքն, ուժի միջոցով հարցի լուծման ճանապա՞րհն ես ընտրել, պարոն Ալիև։
Մենք պատրաստ ենք: Ես ուզում եմ վստահեցնել, որ արդյունքները մեզ համար պարզ են. այն, ինչ ունեցել եք 1994 թվականին, կունենաք նաև այսօր: Մեզ հետ ուժի լեզվով չփորձեք երբևէ խոսել: Ուժի լեզվով երբևէ չհամարձակվեք խոսել մեզ հետ: Կամ ասում եք՝ «մեր հին քաղաք Իրևանը տվել եմ Հայաստանին», դա չի կարելի ներել, դուք հնարավորություն ունեք ձեր «պատմական» անճշտությունները շտկելու, եթե այդպես եք մտածում, բայց դա լինելու է կործանարար Ադրբեջանի համար։ Ուժի լեզվով երբևէ չհամարձակվեք խոսել մեզ հետ»,- ասել է Արայիկ Հարությունյանը։
Հանուն արդարության՝ պետք է ընդգծել, որ Ալիևին Արայիկ Հարությունյանի կողմից տրվել է համարժեք պատասխան, բայց քանի որ Արցախի հարցի լուծումը պետք է ընդունելի լինի Ադրբեջանի, Արցախի և Հայաստանի ժողովուրդներին աբսուրդի հեղինակը Նիկոլ Փաշինյանն է, անհրաժեշտ է, որ Ալիևին պատասխան ինքը տա ու մեզ էլ բացատրի, թե ինչու Ալիևը չի առաջարկում այնպիսի լուծում, որը ընդունելի կլինի Հայաստանի և Արցախի ժողովուրդների համար:
Նիկոլ Փաշինյանը պարտավոր է Ալիևի հոխորտանքներին տալ համարժեք պատասխան ու վերաձևել իր կողմից հնչեցված աբսուրդը: Փաշինյանը պարտավոր է հրաժարվել Հայաստանին Ադրբեջանի հետ տարածքային վեճի մեջ ներքաշող այդ անիմաստ թեզից ու ինքն էլ հայտարարի, թե ինչ կստանա Ալիևը, երբ ադրբեջանցի երիտասարներին ուղարկի իրենց պապերի կիսատ թողածը ավարտին հասցնելու համար, այնպես որ Ալիևը սպասում է Փաշինյանի պատասխանին: