Քաշվածներն ու քցվածները
Մարդու իրավունքների եվրոպական դատարանը հրապարակել է Ռոբերտ Քոչարյանի և մյուսների գործով խորհրդատվական կարծիք:
ՄԻԵԴ-ը հստակ վերահաստատել է հետադարձ ուժի արգելքի և օրենքի որոշակիության ստանդարտները և այս ամենից պարզ է դառնում, որ այդ գործով չի կարող կիրառվել 300.1-րդ հոդվածը։
Հիմա Սահմանադրական դատարանը սպասում է ևս մեկ կարծիք, որը այս անգամ կստանա արդեն Վենետիկի հանձնաժողովից, բայց ՄԻԵԴ-ի այս կարծիքը ցույց է տալիս, որ այն, ինչ այս ողջ ընթացքում ասում էին Քոչարյանի փաստաբանները, ճիշտ է՝ 300.1 հոդվածն ունի հստակության խնդիր:
Միայն այս արձանագրումն արդեն ցույց է տալիս, որ նվազագույնը, որը պետք է արվի, դա Ռոբերտ Քոչարյանի խափանման միջոցի փոփոխությունն է, որովհետև չի կարող մարդը բանտում անցկացնել մի դեպքում, երբ նրան մեղսագրվող արարքը 100 տոկոս ճշմարտությամբ Քրեական օրենսգրքով հանցագործություն չի համարվում և այդ մեղադրանքն ունի անորոշության շատ կողմեր:
Իրավաբան լինել պետք չէ հասկանալու համար, թե ինչ է ասել Մարդու իրավունքների եվրոպական դատարանը և դա պարզ է բոլորին, բացի իշխանության ներկայացուցիչներից:
Ամբողջ իշխանական քարոզչամեքենան լծված նույն նախադասության տարածմամբ՝ սկսած Ալեն Սիմոնյանից վերջացրած Գայանե Աբրահամյան ու նախկին լրագրող Սիսակ Գաբրիելյան իրենց սուրբ պարտականությունն են համարել գուժել, որ ՄԻԵԴ-ը քաշեց Ռոբերտ Քոչարյանի պաշտպաններին ու մերժեց Քոչարյանին: Սա արվում է հստակ ընդգծված քաղաքական ենթատեքստով՝ փորձելով հանրության մեջ ձևավորել կարծիք, թե ահա Քոչարյանին մերժեցին նաև ՄԻԵԴ-ից, թեև տեղի է ունեցել ճիշտ հակառակը:
Այս իշխանությունը չի հասկացել, որ էժանագին մանիպուլյացիաներով մարդկանց ուղեղները լվանալու իրենց բոլոր փորձերը արդեն անարդյունավետ են, որ տեղեկատվական դաշտում սխալ խաղի կանոններ ընտրելու և կիրառելու համար քայլարածների թիմը ջախջախիչ պարտություն է կրել, իսկ դա ամեն օր ապացուցում է Նիկոլ Փաշինյանն իր ուղիղ եթերներով, որոնք բնակչության վրա ունենում են զրոյական արդյունավետություն:
Հիմա որքան էլ իշխանական քարոզչամեքենան խեղաթյուրի ՄԻԵԴ-ից ստացած կարծիքը ներկայցնի այնպես, ինչպես կերազեր ստանալ, միևնույնն է՝փաստերի ու ապացույցների դեմն առնել պարզապես չի կարող:
Այս հարցում էլ քայլարած պատգամավորների էժանագին ստատուսները ունենալու են զրոյական արդյունավետություն:
NewsPress.am