Հանրաքվե չի լինի, որովհետև մերժումը մոտենում է
Ուղիղ կես տարի քաղաքական մեծամասնությունը 3 միլիոն վարչապետերին համոզում էր, որ երկիրը երկիր չի դառնում, որովհետև կա Սահամանադրական դատարանն ու նրա նախագահ Հրայր Թովմասյանը։
Հրայր Թովմասյանից կերտեցին նոր ժամանակների հրեշ, որի պատճառով մեր երկիր ներդրողներ չեն գալիս, լավ չենք ապրում, բարձ աշխատավարձ չենք ստանում, արտաքին քաղաքականության հարցում տապալումներ ունենք ու նման տասնյակ պատճառներ ու որպես հարցի միակ և կարևորագույն լուծում վճռվեց գնալ հանրաքվեի։
Այսպես էր երեք ամիս առաջ, իսկ այսօր Նիկոլ Փաշինյանի քաղաքական հենարանը խորհրդարան է ներկայացրել օրենսդրական նախագծերի փաթեթ, որպեսզի հանրաքվեն չեղարկի։ Զավեշտն այն չէ, որ իշխանությունը մի քանի ամիսների տարբերությամբ բղավում է իրար հակադրվող բաների մասին, այլ այն, որ հանրաքվեն մերժելու հարցում ճառեր է կարդում այնպիսի ջանասիրությամբ, ինպես անում էր հանրաքվեի անհրաժեշտության մասին խոսելիս։
Իշխանությունն իր տարերային ու իրար հակասող քայլերով ամեն օր զրոյի է հավասարեցնում իր վարկանիշը՝ անգամ այդ գործում որևէ չափաբաժին չթողնելով ընդդիմության ուսերին։
Իշխանությունն ապրում է թիթեռի կյանքով՝ մտածում միայն մեկ օրվա գոյության համար՝ անընդհատ ընդունելով այնպիսի որոշումներ, որոնք կյանքի կոչելն անգամ ի վիճակի չէ։
Որևէ մեկս չի կասկածում, որ իրավագիտության հանճար Վահագն Հովակիմյանի հեղինակած նախագծերի փաթեթը մնալու է անկատար, ինչպես անկատար մնացին Հրայր Թովմասյանից ազատվելու նախկին բոլոր նախագծերը։
Ցայտնոտի մեջ հայտնված իշխանությանը Թովմասյանը իր բարձունքից նայում և ժպտում է՝ համատարած անկարողության, անգրագիտութան, կարողությունների բացակայության համար, բայց ինչ է տեսնում շարքային քաղաքացին, ինչպես են այս հակադրությունները ազդում քաղաքացու գիտակցության վրա և ինչ հետևանք է դա ունենում, դա է կարևոր հարցը։
Նման տարերայնությունը հասարակության մեջ սերմանում է իշխանության խոսքը չկարևորելու բնավորության գիծ, ժողովուրդը սկսում է կասկածել այն իշխանության ասածների վրա, որն այսօր հերքում է իր երեկվա ասածը, ժողովուրդը սկսում է այս ամենին նայել բացարձակ անտարբերությամբ՝ իսկ դա բերում է համատարած հիասթափության։
Մյուս կարևոր հարցը իշխանության վստահության խայտառակ ցածր ցուցանիշին է, թեև Ալեն Սիմոնյանն ԱԺ ամբիոնից հայտարարեց, որ իրենց վտսահությունն այնքան բարձր է, որ ամեն օր էլ կարող են հանրաքվե անցկացնել, սակայն ակնհայտ է՝ իշխանությունը չեղարկեց հանրաքվեն, որովհետև գիտի՝ իր մերժվելու օրերը հաշված են։
NEWSPRES.am