Փաշինյանին ձեռք չի տալիս ունենալ ուժեղ և առողջ խորհրդարան․ քաղաքագետ
Սպասելի իրադարձություն էր․ այս խորհրդարանից ավելին ակնկալել չի կարելի։ NEWSPRESS.am-ի հետ զրուցում մայիսի 8-ին Ազգային ժողովում տեղի ունեցած ծեծկռտուքի վերաբերյալ իր տեսակետը հայտնեց քաղաքագետ Վահե Բունիաթյանը: Նրա խոսքով՝ երբ ամեն պատահած մարդ հայտնվում է ԱԺ ում, ապա լինում է այն, ինչ եղավ:
«ԱԺ-ում պատահականորեն հայտնվել են մարդիկ, ովքեր խորհրդարանում են զուտ Նիկոլ Փաշինյանի հետ քայլելու արդյունքում»,- ասաց Վահե Բունիաթյանը։
Նրա գնահատմամբ՝ ԱԺ-ն լիովին արտացոլում է Նիկոլ Փաշինյանի վարած քաղաքականությունը։ Մյուս կողմից էլ, քաղաքագետի դիտարկմամբ, այնպես չէ, որ Նիկոլ Փաշինյանն ուզում էր ունենալ ուժեղ, գործուն և առողջ խորհրդարան, որը կարող էր վերահսկել կառավարության աշխատանքը և չունեցավ։ Նա նկատում է, որ Փաշինյանը խորհրդարան է բերել մարդկանց, ովքեր հլու-հնազանդ պետք է հաստատեն կառավարության որոշումները, ինչի արդյունքում էլ կարելի է հաճախ սպասել նման միջադեպերի, բայց ո՛չ այսօրվա ու ո՛չ էլ սրան նախորդած, կամ հնարավոր միջադեպերը չեն կարող հիմք տալ կարծելու, թե ամեն ինչ արվում է Ազգային ժողովը ցրելու համար։
«Ազգային ժողովը ցրելու սցենարը այդքան հեշտ չէ պատկերացնել։ Իհարկե, կան տարբերակներ, բայց գոնե այս պահին Նիկոլ Փաշինյանին ձեռք չի տալիս ցրել խորհրդարանը։ Հեշտ կառավարելի, խուճապային Ազգային ժողովը, որն արագ հաստատում է կառավարության կողմից ներկայացված որոշումներն, առայժմ պետք է Փաշինյանին։ Սա նաև հնարավորություն է նրա համար, հետագայում իր սխալ կառավարման հետ կապված անհաջողությունները բարդել ԱԺ վրա՝ հաշվի առնելով որ այս պահին, որպես խորհրդարանական երկիր, ԱԺ-ն հանդիսանում է պետության գերագույն մարմին։ Այնպես որ, խորհրդարանը ցրելու ժամանակը դեռ չի եկել»,- ասաց մեր զրուցակիցը՝ հավելելով, որ սխալ կլինի այս պարագայում բարձր գնահատել խորհրդարանի դերը։
Քաղաքագետի գնահատմամբ՝ այսօր խորհրդարանն ավելի պակաս գործառույթներ է իրականացնում, քան մինչ այս իրականացնում էր։ Ըստ նրա՝ խորհրդարանը կամակատարի դեր ունի՝ չկա լուրջ խորհրդարան և, առավելևս, չկա խորհրդարանական ընդդիմություն։
Քաղաքագետն ընդգծում է, որ այսօր չկա խորհրդարանական ռեալ ընդդիմություն։ Ըստ նրա՝ խորհրդարանական ընդդիմության դերը փորձում է իրականացնել «Լուսավոր Հայաստան» խմբակցության ղեկավար Էդմոն Մարուքյանը, բայց ոչ նրա համար, որ իրոք իրենք ցանկանում են ցույց տալ, թե խորհրդարանում կա իրական ընդդիմության, այլ նրա համար, որ ժողովրդին աչքին երևան ու հետո կարողանան քվեներ ապահովել։ Վահե Բունիաթյանի խոսքով՝ դա արվում է ժողովրդի այն հատվածի համար, ովքեր դեմ էին նախկիններին ու չեն ընդունում նոր իշխանության վարած քաղաքականությունը։
«Ընդդիմություն լինում են կամ չեն լինում, ընթացքում ընդդիմություն չեն դառնում։ Էդմոն Մարուքյանն ու «Լուսավոր Հայաստան»-ն ի սկզբանե կառավարության քայլերի ջատագովն էր։ Տեսնելով Փաշինյանի ռեյտինգի անկումը՝ սկսեց հստակ ընդդիմություն խաղալ»,- ասաց քաղաքագետը։
Վահե Բունիաթյանը նաև նկատում է, որ որքան էլ Նիկոլ Փաշինյանը փորձի ցույց տալ, թե Հայաստանը «ժողովրդավարության բաստիոն» է, փաստերը հակառակն են ցույց տալիս։
«Մարդիկ եկել են իշխանության կոնկրետ նպատակով, բայց ոչ թե երկրի շահի, այլ սեփական ես-ի ու սեփական շահի նպատակով։ Փաշինյանի 2 տարվա պաշտոնավարումը միայն հաստատեց դա․ 2 տարվա ընթացքում այս երկրում լուրջ փոփոխություններ տեղի չունեցան։ Ասֆալտի ու բանակի սննդի հարցի լուծումը հեղափոխական քայլեր չեն։ Հեղափոխական կլիներ, եթե Փաշինյանն ի սկզբանե աներ այն ամենը, ինչ խոստացել էր․․․ չարեց»,- եզրափակեց Բունիաթյանը։