ՀՀ ոչ մի ղեկավար Արցախի հարցի առնչությամբ այդքան թափանցիկ չի եղել, որքան ես. Փաշինյանի դիրքորոշումը նույնն է
ՀՀ ոչ մի ղեկավար Արցախի հարցի վերաբերյալ այնքան դիրքորոշում չի հայտնել, որքան ես։ Այս մասին ԱԺ֊ում հայտարարեց ՀՀ վարչապետ Նիկոլ Փաշինյանը՝ պատասխանելով «Բարգավաճ Հայաստան» խմբակցության պատգամավոր Նաիրա Զոհրաբյանի հարցին, թե Ս. Լավրովի և Զ. Հասանովի վերջին հայտարարություններից հետո ինչ դիրքորոշում ունի Փաշինյանը:
Փաշինյանը հերթական անգամ հայտարարեց, որ ինքը Ղարաբաղի խնդրի կարգավորման հարցում ամենաթանցիկն է և դիրքորոշումը մնում է նույնը:
«Այսինքն՝ մեր դիրքորոշումը գոյություն ունի՝ անկախ նրանից, թե աշխարհում էլ ուրիշ ինչ դիրքորոշումներ գոյություն ունեն։ Եվ պարզ է, որ աշխարհում բազմաթիվ դիրքորոշումներ գոյություն ունեն՝ անկախ մեր դիրքորոշումներից։ Եվ այս կարգավորման ողջ գործընթացը նրա համար է, որ մենք փորձենք պատասխանել մի հարցի՝ կարո՞ղ ենք արդյոք մենք մոտեցնել մեր դիրքորոշումներն իրար, կարո՞ղ ենք ձևավորել մեկ ընդհանուր դիրքորոշում»,- ասաց Փաշինյանը։
Նրա խոսքով, ինքը բանակցային բանաձևում ևս երկու կոմպոնենտ է մտցրել, որ Արցաախի հարցի որևէ լուծում չի կարող գործնականում դառնալ լուծում, եթե դա ընդունելի չէ Հայաստանի և Արցախի ժողովուրդների համար։
«Ավելին, ես ասել եմ, որ չի կարող լինել լուծում, քանի դեռ մենք չենք եկել և ասել ժողովուրդ, կարծում ենք էսպիսի լուծում կա, եկեք դռնփակ նիստ անենք և այդ լուծումն առաջարկենք և չլսենք կարծիքներ՝ պետք է գնալ այդ լուծմանը, թե չէ։ Եվ մենք էսպիսի առաջարկով կգանք միայն այն պարագայում, երբ ես, ԱԳ նախարարը կտեսնենք, որ ինչ-որ տարբերակ կա, որը սկզբունքորեն կարող է քննարկելի և ընդունելի լինել։ Քանի դեռ մենք նման առաջարկով չենք եկել, էն մնացածը դիրքորոշումներ են, իսկ ես՝ իմ նախկինում հայտնած դիրքորոշումներից ոչ մի բան՝ նույնիսկ մի ստորակետ պակասեցնելու և նույնիսկ մի ստորակետ ավելացնելու անհրաժեշտություն չեմ տեսնում»,-եզրափակեց Փաշինյանը։