Մարինա Խաչատրյանը Նիկոլ Փաշինյանին խնդրում է չվաճառել բնակարանը և այն նվիրել բազմազավակ ազատամարտիկի ընտանիքին
«Առողջ Հանրություն» ՀԿ նախագահ Մարինա Խաչատրյանը բաց նամակ է հղել վարչապետ Նիկոլ Փաշինյանին։ Դրանում, մասնավորապես, ասվում է.
«Բաց նամակ Նիկոլ Փաշինյանին
(ուղարկվում է նաև էլ. փոստով)
Հարգելի՛ պարոն Փաշինյան,
ՀՀ քաղաքացի Մխիթար Ալումյանը, ով ունի 5 անչափահաս երեխա ( 2 երեխան հաշմանդամ են ) և հաշմանդամություն ունեցող կին, ով իր կյանքի 20 տարին նվիրել է մեր հայրենիքի պաշտպանության գործին ( ազատամարտիկ է ), ունի լուրջ սոցիալական խնդիրներ։ Մասնավորապես, պարո՛ն Ալումյանի ընտանիքը բնակվում է կիսավեր տան մեկ խոնավ սենյակի մեջ։
2019 թվականին ՀՀ Պաշտպանության նախարարության բարձրաստիճան պաշտոնյաների հորդորով քանդվել են պարոն Ալումյանի տան բոլոր սենյակները, բացի մեկից` ՀՀ ՊՆ բյուջեի միջոցներով նոր տուն կառուցելու խոստմամբ։
Սակայն, տունը քանդելուց հետո, ՀՀ պաշտպանության նախարար Դավիթ Տոնոյանն իր խոստումը չի կատարել` ընտանիքին թողնելով մեկ խոնավ սենյակում` ձմռան ցրտին դիմակայելու։
Քաղաքացի Ալումյանը գումարային շուրջ 70 օր հացադուլի է նստել ՀՀ ՊՆ շենքի մոտ, սակայն, այս ծայրահեղ քայլը նույնպես եղել է ապարդյուն։
Հաշվի առնելով այն հանգամանքը, որ Դուք ունեք բնակվելու բարվոք պայմաններ և վաճառում եք Ձեզ պատկանող բնակարանը, իսկ քաղաքացի Ալումյանի բազմազավակ ընտանիքը մնացել է առանց տանիքի, հաշվի առնելով ՀՀ քաղաքացի Ալումյանի մատուցած ծառայությունները մեր հայրենիքին` խնդրում եմ չվաճառել Ձեր բնակարանը, այլ կատարել նվիրատվություն պարոն Մխիթար Ալումյանի ընտանիքին։
Վստահ եմ, որ ի պաշտոնե և մարդկային տեսանկյունից չեք մերժի ձեռք մեկնել ՀՀ քաղաքացուն։
Հ.Գ. Խնդրում եմ պարզել, թե ինչու է ՀՀ Պաշտպանության նախարար Դավիթ Տոնոյանը սուտ խոստում տվել ՀՀ քաղաքացուն, որի արդյունքում քանդվել է վերջինիս տունը, և ինչու պարոն Տոնոյանը չի պահել իր տված խոստումը` անարգելով սպայի ուսադիրները։
Դիմող`
«Առողջ Հանրություն» ՀԿ նախագահ
Մարինա Խաչատրյան