Մաճաճ Կարեն, ձեր կարճլիկ թաթիկները հեռու պահեք ինձնից, թե չէ տեխնիկապես զարգացած դար է՝ տեսագրություն, արխիվ. Արիանա Հովսեփյանը՝ պաշտոնյային (վիդեո)
Ուշագրավ շշուկներ են հասնում ականջիս. կայքում հրապարակված մի հոդվածի հերոսը «չի մարսել» իր մասին գրվածն ու որոշել է ինձ «պատժելու» մեխանիզմներ մշակել: Ինչպես ասում են, եթե դու աղվեսն ես, ես էլ պոչն եմ...
Մասնավորեցնեմ, ապա ներկայացնեմ մի տեսանյութ այսօրվա հիմնական «հերոսի» մասին:
Տեսանյութում երևացող համազգեստավորը Մաճաճն է` Երևան քաղաքի վարչության քրեական հետախուզության բաժնի պետ Կարեն Գրիգորյանը: Հեղափոխությունից հետո ԱԺ «Իմ քայլը» խմբակցության պատգամավոր Սասուն Միքայելյանը Մաճաճին ազատել տվեց աշխատանքից: Հետո, բախտի բերմամբ թե պատահմամբ, երբ Երևանի ոստիկանապետ նշանակվեց Արմեն Գասպարյանը՝ Գսպոն, Մաճաճին վերականգնեց աշխատանքում. տարավ նախ Իջևանի ոստիկանապետ, հիմա էլ՝ Երևանի վարչության քրեականի հետախուզության բաժնի պետ։
Հիմա մի քանի հիշեցում ինձ «պատժել» որոշած Մաճաճին: Հենց իր անփառունակ կենսագրությունից: Ի դեպ, չթաքցնեմ՝ տեղեկությունները մեկը մյուսի հետևից ինձ են հասնում հենց նրա շրջապատից՝ քթի տակից:
Ա'յ Մաճաճ, երբ ընկեր-հարազատներդ ասում են, թե տարիներ առաջ՝ 6-րդ վարչությունում աշխատելու տարիներին, «բառիկից» փո՞ղ էիր վերցրել, թե՞ «հովանավորել» էիր, ու Ալիկ Սարգսյանն էլ հանեց քեզ զբաղեցրած պաշտոնից, ճի՞շտ էր։ Հետո կասե՞ս՝ ինչպե՞ս նշանակվեցիր աշխատանքի։
Շրջապատիդ նույն «չար լեզուներն» ասում են նաև, թե ջերմոցներ էլ ունես: Եթե իրոք այդպես է, բա էս տարի ջերմոցներդ ի՞նչ ես արել` Գսպոյին «գրեֆ» անո՞ւմ ես գոնե։
Ասում են՝ ստերիդ, քո սիրած բառով ասած՝ «մուտիտ»-ների համար նախկին ոստիկանապետ Վովա Գասպարյանը քեզ քո անունով չէր դիմում: Էդպե՞ս է: Կհիշեցնե՞ս՝ քեզ ինչպես էր դիմում՝ «Մուտի՞տ», թե՞ «Բառիկ» մականունով...
Նախկինների դեմ իբրև թե պայքարող Մաճաճ, որ նախկինների ներկայացուցիչների հետ գաղտնի հանդիպում ես ու, բնավորությանդ ու սովորությանդ համաձայն, իբր «լավություն ես ծախում» նրանց, չե՞ս մտածում, որ կարող է տարածքի վերահսկող տեսախցիկներով տեսագրվես ու, ձայնագրությունները պահպանվի..․
Ախր, մի քիչ զգույշ եղիր, հո ե՞ս չեմ քեզ սովորեցնելու: Ախր ոստիկանը դո՛ւ ես, դո՛ւ ավելի լավ պետք է իմանայիր։ Վերջ ի վերջո, քրեականի հետախուզության բաժնի պետ ես․․․
Ի դեպ, մի բան էլ. էն «զույգիդ»՝ Գասպարյան Արմենի առաջին տեղակալ Զաքարյան Արթուրին հարցրու՝ Լճերի Արոյից ի՞նչ նորություն կա։ Շրջապատիցդ հայտնում են, թե Լճերի Արոն ահագին փող է տվել Զաքարյան Արթուրին։ Նա էլ, ինչպես միշտ և ամենուր, տղայի՝ «Նարեկի արև» երդվել է, թե ինքը ոչ մի կապ չունի ու շատ մաքուր է աշխատում․․․
Հիմա հարց Զաքարյան Արթուրին. Արթուր, Գասպարյան Արմենի մո՞տ էլ ես Նարեկիդ արևով երդվում, որ մաքուր ես աշխատում։ Չէ՞ որ մինչև հեղափոխությունը, ինչպես շատերն են ասում, երբ դեռ Մասիսի ոստիկանապետի տեղակալն էիր, Մասիսի քաղաքապետ Դավիթ Համբարձումյանի հորը՝ Մհեր Համբարձյումյանին, իբր հարգանքով, «հոպար» էիր ասում ու գրեթե ամեն երեկո իրենց տանը «զեկուցում» էիր, թե ինչ է կատարվել այդ օրը...
Ախր, դուք որ մոռանում եք, չի նշանակում, թե բոլորը ձեզ պես կարճ հիշողություն ունեն: Դասականն ասել է՝ մի՛ արեք, պարզապես մի արեք:
Հիմա էլ, ասում են ու չեն կասկածում, որ հեղափոխությունից հետո այդ նույն ընտանիքի դեմ առաջին «գրողներից» մեկն ես եղել դու: Բա եղա՞վ: Եթե իրոք այդպես է, ամո՜թ, հազա՛ր ամոթ, եթե այդպես չէ, ուրեմն «մաքրեք» ձեր շրջապատը:
Թե չէ, վատ բան է վատ ընկերությունը, Արթուր ջան։ Շա՜տ վատ...
Ասում են նաև, թե Մասիսում աշխատելու ժամանակ գործակալի փող ես «տակով արել-կերել» ու բռնվել, հետո էլի ես Նարեկի արև երդվել ու ասել, թե դու չես արել։ Էլի բաներ են ասում: Ընկերներիդ բառով ասեմ. ասում են, որ շատ «անաղուհաց» մարդ ես, որ Մասիսի բաժնի ընկերներիդ տանը, ընկերներիդ մայրերի տված հացն ես կերել, ու հետո էլ ընկերներիդ ոտի տակն ես փորել։
Արթուր ջան, մի ցավոտ բան էլ հիշեցնեմ. ոստիկանության Արտաշատի բաժնում քրեական բաժնից մի «օպեր» էր մահացել: Երկար ժամանակ ամեն ամիս վարչության բոլոր աշխատակիցները գումար էին հավաքում ու տալիս մարդկային կորուստ կրած ընտանիքին: Բայց էդ ամբողջ գումարի կեսն էր տեղ հասնում: Կարո՞ղ է իմանաս, թե ուր էր անհետանում կես գումարը:
Ասածս ինչ է՝ այնպես չանեք, դու ու քո որոշ ընկերներ, որ քո որոշ ձայնագրություններ հայտնվեն համացանցում, բոլորն իմանան իրական կերպարդ ու դառնաս հերթական պաշտոնաթող-ունեզուրկը, ջերմոցներդ ու լճերդ չհասցնես վայելել։
Ուրեմն ականջներիդ օղ արեք, այ կոռումպացված նախկին ու նոր ոստիկաններ. եթե 2 օրում ձեր մասին այսքանը հենց այնպես հասել է ականջիս, առանց ջանքերի, ուրեմն պատկերացնո՞ւմ եք, որ մի քիչ իսկապես փորփրեմ ձեր կեղտոտ կենսագրությունը, ինչե՜ր կիմանամ ու ձեր վերադասներին ինչ փաստեր կներկայացնեմ ձեր «հերոսությունների» մասին։
Ի դեպ, հետաքրքիր է, այսքանից հետո ոստիկանապետը չի՞ հետաքրքրվելու ձեզնով, ձեր արած-չարածով ու պահելո՞ւ է ձեզ ձեր աթոռներին: Գոնե իր անվան ու համբավի համար: Այլապես դուք ոչ միայն ձեզ, այլև ամբողջ համակարգն եք արատավորում:
Հիմա, կնոջ գլխին սարքել-բռնել տվող տղաներ, գնացեք, մտածեք, թե այդ ինչպե՞ս է պատահում, որ ձեր միջից, հենց ձեր քթի տակից նման տեղեկություններ են դուրս տրվում։ Դուք ձեր մեջ այնքան անկազմակերպ եք, որ այսքան բանը հասել է ինձ. Էդ չե՞ք...
Այնպես որ, հանգիստ նստեք տեղներդ ու հերիք է իմ շրջապատից ինձնով հետաքրքրվեք ու իմ վրա «գործ սարքելու» տարբերակներ փնտրեք։ Չի՛ ստացվելու: Անհույս զբաղմունք է: Իմ շրջապատում «կռիսներ» չկան...
Իսկ դու, Գասպարյան Արմեն, սա ընդունիր որպես փոքրիկ նախազգուշացում ու ճուտիկներիդ դաստիարակիր, թե չէ դու էլ կհայտնվես մանրադիտակի տակ, ու նույնիսկ Լոնդիկը քեզ չի փրկի: Հասկանո՛ւմ ես, թե ինչ եմ ասում...
Իբրև ամփոփում՝ տղաներ, ձեր ոչնչի չհասնող, կարճլիկ թաթիկները հեռու պահեք ինձնից, իմ շրջապատից, անձնական տարածքից, առավել ևս՝ ընտանիքից: Թե չէ տեխնիկապես զարգացած դար է՝ ձայնագրություն, տեսագրություն... Մեր վարչապետն էլ իրեղեն ապացույցներ սիրող մարդ է ու դժվար է ներում նախկիններին: Դուք նրա համար, վերջին հաշվով, Սերժի մնացորդ եք, ոչ ավելին...
Արիանա Հովսեփյան
NEWSPRESS.am-ի հիմնադիր-տնօրեն