Արման Սարգսյանը, եթե մեր թիմի անդամ չլիներ, ոստիկանապետ չէր լինի. Ալեն Սիմոնյան
Շատ ժամանակ է անցել, կոնկրետ չեմ կարող ասել՝ այդ օրը ինչ հարցով եմ եղել ոստիկանությունում, բայց ժամկետային առումով ենթադրում եմ, որ դա կապված է պետահամարանիշներին վերաբերող օրենսդրական նախաձեռնության հետ, որը դեռևս շրջանառության մեջ դրված չէ։ Այս մասին Tert.am-ի հետ զրույցում ասել է ԱԺ փոխխոսնակ Ալեն Սիմոնյանը՝ անդրադառնալով հարցին, թե նկատել են, որ մարտի 28 –ին Ոստիկանությունում հանդիպել է ոստիկանապետի հետ, սակայն հանդիպման մասին պաշտոնապես տեղեկություն չի տարածվել: Ալեն Սիմոնյանը նշել է, որ նախագծի վերաբյալ ինքը արդեն խոսել է․ խոսքը վերաբերում է նրան, որ օրենսդրական կարգավորումից հետո քաղաքացին կարողանա գնել պետհամարանիշ՝ իր ցանկացած նիշերով կամ բառերով:
«Նախագծով առաջարկվում է պետհամարնիշների հատուկ ձևով վաճառքը օրենսդրորեն թույլատրել, ինչը ոստիկանությունը պետք է կազմակերպի: Ես կրկնում եմ, իր հետ հաճախ եմ հանդիպում որովհետև ընկերական հարաբերություններ ունեմ: Բայց կոնկրետ չեմ հիշում, որ այդ օրն այդ նախագծի շուրջ է եղել քննարկումը, կարելի է ասել, ամիսը մեկ անգամ հանդիպում եմ նրա հետ», - մանրամասնել է Ալեն Սիմոնյանը:
Անդրադառնալով դիտարկմանը, թե խնդիրը նրանում է, որ այդ հանդիպումների վերաբերյալ տեղեկատվություն չի տրվում, Ալեն Սիմոնյանն ասել է.
«Դե, գիտեք, մի թիմի անդամ ենք բոլորս, շփվում ենք տարբեր հարցերով, մեկ-մեկ լինում է, որ հեռախոսով խոսելը այնքան էլ հարմար չի լինում, մասնավորապես, երբ խոսքը վերաբերում է ինչ-որ նախագծերի քննարկմանը»,-նկատել է նա:
Ալեն Սիմոնյանը նշեց, որ մոտ 15 օր առաջ ևս հանդիպել է ոստիկաապետի հետ, այդ պատճառով է տարակուսում նշված նախագիծը մարտի 28 –ին է քննարկվել, թե այլ հանդիպման ժամանակ:
Անդրադառնալով դիտարկմանը, որ խնդրահարույց չէ ոստիկանապետին քաղաքական թիմի անդամ ներկայացնելը, նրա գործողությունները քաղաքական բնույթ չեն կարող ենթադրել, ԱԺ փոխխոսնակը պատասխանել է.
«Իհարկե, թիմի անդամ է, բա մեր թիմից է, մեր թիմի անդամ չլինի, ուրիշի թիմի անդամ լինի, ոստիկանապետ չի լինի: Իր քաղաքական բնույթ կրելը որն է, այդպիսի բան լինի, բոլորով կհոշոտենք»,-եզրափակել է նա:
Նյութն ամբողջությամբ՝ սկզբնաղբյուր կայքում