Բա չասեցիք` էն անօթևան ընտանիքն ի՞նչ եղավ, որ իբր ձեր բնակարանն էիք տրամադրել
Ժողովուրդ, այսօր ուզում եմ օրը սկսել հիշողություններով...
Հիշում եք չէ՞, որ 2018 թվականի հեղափոխությունից անմիջապես հետո վարչապետ Նիկոլ Փաշինյանը կառավարական առանձնատուն տեղափոխվեց ու իր բնակարանը տվեց ինչ-որ ընտանիքի՝ անվարձ ապելու (դե համենայնդեպս այդպես հայտարարվեց):
Հիշում եք, չէ՞, թե այդ ժամանակ այդ լուրն ինչպես ցնցեց բոլոր քայլարածներին, նրանք իրենց առաջնորդի այս քայլը համարեցին մեծահոգության և մարդասիրության իսկական օրինակ:
Հիշում եք, չէ՞, որ այդ ժամանակ Աննան ասել էր, թե «այդ ընտանիքում ապրում է դաունի սինդրոմով 23 տարեկան տղա: Ընտանիքում տղամարդ չկա. տատիկն է, մայրիկը և երեխաները: Մայրիկը միայնակ է հոգում իրենց ապրուստը: Մինչ այս ապրում էին եկեղեցու հովանավորությամբ ինչ-որ բնակարանում, որի տերը որոշել էր վաճառել բնակարանը: Նրանց նոր բնակության վայր ապահովելու հրատապ կարիք էր առաջացել»...
Բա հիմա այդ ընտանիքի հարցը ո՞նց է լուծվելու, հիմա էլ իրե՞նք են դրսում թողնելու... Խիստ կասկածում եմ, որ այդ ընտանիքի տան հարցը հետագայում լուծած լինեն, քանի որ Աննան ու Նիկոլը առիթը ձեռքներից բաց չէին թողնի հերթական անգամ փիառվելու, բայց այդ մասին, ինչպես գիտենք, ոչ մի տեղեկություն։
Ու ստացվում է, որ կամ նման ընտանիք չի եղել ու դա հերթական պոպուլիստական հայտարարությունն էր՝ գովազդվելու համար, կամ էլ բոլորի աչքից հեռու՝ այդ ընտանիքը նորից դրսում կմնա...
Ամեն դեպքում, այսօր արդեն Փաշինյանի բնակարանը դրված է վաճառքի estate.am կայքում՝ տների վաճառքի հայտարարությունների բաժնում, արժե 85 հազար դոլար:
Հիշում եք, չէ՞, թե ինչպես հանրաքվեի քարոզարշավի ժամանակ Նիկոլը հպարտացավ, որ կարողացել է տուն առնել, պարծեցավ կուրթանեցի Մեխակի մոտ, թե ես կարողացել եմ, տուն եմ գնել, գնա աշխատի, դու էլ քոնը գնիր:
Հիմա նայում եմ այս բնակարանի լուսանկարներն ու մտածում, թե ինչու է Փաշինյանը վաճառում այն, որի գնելու պատմությանը տեղյակ է նրա սերնդակից ցանկացած լրագրող։ Փաշինյանին այսօր հիշեցնում են թե՛ վաճառքի դրված այդ տան, թե՛ տան կահույքի, թե՛ իր թերթը պահելու, թե՛ գործարարից ստացած «Նիվա»-ի ու դրա վառվելու պատմությունները:
Իսկ գուցե Փաշինանը որոշել է ջնջե՞լ հիշողությունն ու այդ հիշողության անբաժան մասնիկ համարվող բնակարանը:
Այս համատեքստում չեմ կարող չհիշեցնել ու չասել քեզ, պարո՛ն վարչապետ, եթե դու հիշում ես, թե ինչպես քո «Նիվա»-ն վառեցին տվածդ խոստումից թռնելու համար, ես էլ ես եմ հիշում, թե իմ մեքենան ինչպես ջարդեցին՝ քեզ քննադատելու համար:
Ի տարբերություն քեզ, ես որևէ մեկին խոստում չէի տվել ու դրանից թռել, ու քո նման էլ սուտ հայտարարություններ չեմ տարածում, որ փիառվեմ. ես ընդամենը քննադատում եմ քեզ ու քո իշխանությանը։ Այնպես որ, այս հարցում դժգոհելու բան չունես. Ես այս պահին չեմ ասում, թե կոնկրետ ում հանձնարարությամբ ջարդեցին մեքենաս, բայց տեղեկացնում ու զգուշացնում եմ՝ զուր մի չարչաչվեք, դա իմ բերանը չի փակելու։
Արիանա Հովսեփյան
NEWSPRESS.am-ի հիմնադիր-տնօրեն