Վրիժառության ու վիրահատության արանքում
Եթե նախկին իշխանությունների ժամանակ մարդուն բանտարկեին, հետո որոշեին, թե ինչ մեղադրանք են նրա վրա կարելու, որից հետո էլ ամսով ձգձգեին այդ նույն մարդու խափանման միջոցի փոփոփխման հարցի քննությունը, այդ ժամանակ սորոսական կերակրատաշտից սնվող իրավապաշտպանները վայնասուն կկապեին ու կոկորդ կպատռեին ազատությունից զրկված այդ մարդու իրավունքների ոտնահարման մասին ու ֆեյսբուքն ու իրենց սպասարկող լրատվամիջոցները կողողեին մարդու իրավունքների պաշտպանության մասին իրենց հարցազրույցներով, բայց երբ նման բան է կատարվում թավշյա իշխանության ժամանակ, այդ նույն սորոսական իրավապաշտպանները կարել են բերաններն ու մոռացել իրենց կարդացած բոլոր իրավունքներն ու միջազգային փաստաթղթերը:
Պարզվում է, որ թավշյա Հայաստանում նախագահին կալանավորել, 1,5 տարի շարունակ չկարողանալ նրա հանցանքն ապացուցելը հերիք չէ, մի հատ էլ նախկին վարչապետների ներկայացրած միջնոդությամբ այդ նույն նախագահի խափանման միջոցը չեն քննում դատարանում:
Պատկերացնո՞ւմ եք՝ Հայաստանում ամսով կալանավորվածի խափանման միջոց՝ այն էլ նախկին վարչապետների միջնորդությամբ չի քննվում դատարանում հենց միայն այն պատճառով, որ դատավորը գնացել է քիթը վիրահատելու և մեկ ամսով աշխատանքի չի գալու: Գնացել է, լավ է արել, իր իրավունքն է, կարող է մարմնի այլ մասերը ևս վիրահատել՝ ևս մեկ ամսով էլ իր հաշվին մնալ արձակուրդում, բայց ինչո՞ւ նրան մակագրված խափանման միջոցի քննության գործը ոչ մի այլ դատավորի չի մակագրվել:
Ակնհայտ է, չէ՞, որ սա հատուկ է արված, որ Ռոբերտ Քոչարյանից որքան հնարավոր է շատ վրեժ լուծեն: Բոլորիս է հայտնի, թե ճաղերից այն կողմ գտնվող 2-րդ նախագահն ինչ հաճույք է պատճառում ներկա իշխանավորներին, իսկ Նիկոլը նրան բանտում պահելով լուծում է կյանքի չստացված օրերի անձնական վրեժը ու դա հասկացել են անգամ սեփական զոհերի արյունը 30 միլիոնով ծախած ու դատարանում իրենց մշտական ներկայությունն ապահովող 10-ը զոհերի հարազատները:
Բոլորը հասկանում են, որ պատճառը Դանիբեկյանի քթի վիրահատությունը չէ, այլ այն, որ պարզապես այդպես է պետք, չի գտնվում այլ դատավոր, որովհետև կա վրեժխնդիր լինելու անհագ ցանկություն, որ դեռ չի հագեցել:
Բոլորը տեսնում են, ամեն ինչ շատ ավելի պարզ է, իսկ երբեմն էլ այս իշխանությունների գործողությունների նման խիստ պարզունակ: Երևի հենց այս պարզունակությունն է նկատել Մարդու իրավունքների պաշտպանը գրություն ուղարկել Բարձրագույն դատական խորհուրդ:
Այո՛, այսպիսի ողբերգական վիճակում է գտնվում թավշյա Հայաստանի դատական համակարգը՝ կախված մեկ մարդուց և այդ մեկ մարդը նա է:
NewsPress.am