Նիկոլը Տեր-Պետրոսյանի միակ ու վերջին շանսն է
Ինչու՞ Լևոն Տեր–Պետրոսյանը հենց այս փուլում հանդես եկավ ուղերձով։ Այս հարցը թերևս շատերի մոտ հնչեց, երբ կարդացին վարչապետ դարձած Նիկոլ Փաշինյանի քաղաքական կնքահոր ինտրիգային կոչը։
Է'լ «Պատերազմական վիճակի թելադրանքով», Է'լ «Պետք է լիցքաթափվել», Է'լ «սադրիչներ ու չարակամներ», Է'լ «ատելության, թշնամանքի սերմանում», Է'լ «երկրորդ ճակատ են բացել», Է'լ «պետական դավաճանություն», Է'լ «հայտնի ուժերի վերահսկողության տակ գտնվող ԶԼՄ-ներ», Է'լ «Գող փիսոլ», Է'լ «Քաչալ շուն»...
Ի վերջո, ի՞նչ ինտրիգ կամ խուճապ էր փորձում ստեղծել Տեր-Պետրոսյանը, այն էլ այս ներքաղաքական հարաբերական հանգիստ վիճակում, որը պայմանավորված է կորոնավիրուսով։
Մի կողմից իհարկե հնարավոր է Տեր-Պետրոսյանը գիտակցում է, որ կարանտինի շրջանը կանցնի ու մարդիկ, դուրս գալով տներից, կառճակատվեն սոցիալ–տնտեսական խնդիրներին ու կլինի այն, ինչից այդքան վախենում է իշխանությունը։ Չի բացառվում, որ հասարակությունն իսկապես կըմբոստանա և կլինեն բախումներ։
Կարելի է ասել, որ այն, ինչ արեց Տեր- Պետրոսյանը, ամբողջովին տեղավորում է նրա գործելաոճի մեջ։ Նա հերթական անգամ փորձեց ցույց տալ, որ ինքն ավելի բարձր է, քան Նիկոլը և հիշեցնել, որ «ասողն» ինքն է, որ ինքը ո՛չ միայն Նիկոլի, այլև «ժողովրդի հայրն» է...
Մի խոսքով, Տեր-Պետրոսյանի կոչը կարելի է համարել նաև մեսիջ` ուղղված իր հոգեզավակին։
Ամեն դեպքում Տեր-Պետրոսյանը իրավիճակը գնահատում է պատերազմական հենց այն ժամանակ, երբ Նիկոլ Փաշինյանը պատրաստվում է թուլացնել խստացված ռեժիմը, հայտարարում է, որ վարակը նահանջում է...
Մյուս կողմից էլ, Տեր-Պետրոսյանը ստեղծված իրավիճակին գնահատականներ տալով, ու այն պատերազմական կամ լարված որակելով, մոռանում է, որ տարիներ շարունակ հենց կոնգրեսականներն են լարվածություն ու բախումներ հրահարել, որ այսօր ՀԱԿ ներկայացուցիչ ու Կոնգրեսից ծնված Նիկոլ Փաշինյանին մոտ գտնվող կայքերի ու նաև Փաշինյանին պաշտպանող ֆեյքերի միջոցով է հենց մաղձ ու ատելություն տարածվում, ու դա արվում է հենց վարչապետի մակարդակով, որ հնչում է մոտավորապես այսպես՝ բոլոր նրանք ով մեզ հետ չեն, համակարծիք չեն, ուրեմն մեր դեմ են՝ ասֆալտին փռել, պատին ծեփել, թաթիկները կտրել...
Իշխանությունների այս մակարդակի հայտարարությունների ֆոնին պարզ է դառնում Լևոն-Տեր Պետրոսյանի ցայտնոտային վիճակի իրական պատճառը։
Նա թեև մի կողմից հայտարարում է, թե անսխալական ու անպարտելի իշխանություն չի լինում, մյուս կողմից շահագրգռված է, որ Նիկոլ Փաշինյանի իշխանությունը երկարատև լինի, որովհետև Փաշինյանը միակ մարդն է, որ կարող է ինչպես Մարտի 1-ի գործի, այնպես էլ շատ հարցերի լուծումներ տանել այն ուղղությամբ, ինչպես ձեռնտու է իրեն՝ Լևոն Տեր-Պ ետրոսյանին...
Նիկոլը Տեր-Պետրոսյանի միակ ու վերջին շանսն է...
NEWSPRESS.am