Ինչո՞ւ որոշեցին հիմա հայտարարել, թե վիրուսի ողնաշարը ջարդում ենք
Չնայած նրան, որ կորոնավիրուսը Հայաստանում շարունակվում է մեծ թափով տարածվել ու գնալով ընդգրկել նորանոր օջախներ՝ Տավուշի մարզից հասնելով մինչև Գեղարքունիք և Կոտայք, իշխանությունը շարունակում է զբաղվել սեփական վարկանիշը մի կերպ փրկելու գործով, որը հիմա շատ մեծ կապով կապված է Հայաստանի տնտեսության վիճակից:
Նրանց չի հետաքրքրում, որ իրենց ոչ պրոֆեսիոնալիզմի հետևանքով է, որ ԱՊՀ տարածաշրջանում վարակակիրների թվով մեր երկիրն առաջինն է:
Հիմա Նիկոլ Փաշինյանը որոշել է դիմել հերթական մանիպուլյացիային և ստեղծել իմիտացիա, թե վիրուսի տարածման պիկից մենք պլստալու շանս ունենք:
Երեկ պարետ Տիգրան Ավինյանը հայտարարեց, թե՝ տեսե՛ք՝ վարակի տարածման ինդեքսում առաջընթաց կա, այսօր էլ վարչապետն ուղիղ եթեր մտավ ու տեղեկացրեց, թե տեմպերի նվազում ունենք, 11 վարակված՝ ապրիլի 6-ի դրությամբ, իսկ եթե այս տեմպը կարողանանք պահել, ապա արտակարգ դրությունը կավարտվի ապրիլի 14-ին:
Վարչապետի և պարետի այս լուրը հասարակության մեջ առաջացրել է դրական էմոցիաներ և հույս, որ կարանտինը մոտենում է ավարտին, և Հայաստանը ուր որ է ջարդելու է կորոնավիրուսի մեջքը, ինչն անելու համար հզոր Չինաստանին պահանջվեց նվազագույնը երեք ամիս:
Եթե հավատանք մեր իշխանության ղեկավարին, ապա Հայաստանը շատ ավելի խոհեմ է գտնվել Չինաստանից ու փաստորեն ավելի արագ տեմպերով է կարողանում վարակի ողնաշարը ջարդել: Բայց ի՞նչ է թաքնված կառավարության այս մանիպուլյատիվ քայլի հետևում:
Պարզվում է՝ արտակարգ դրության 20 օրվա հետևանքով տնտեսությունը կրել է սարսափելի մեծ չափերի վնասներ, իսկ ՀՀ կառավարությունը կարող է նպաստ բաժանելով ձգել ընդամենը մեկ ամիս, դրա համար որոշել են կորոնավիրուսը մեկ ամսվա արտակարգ դրության պայմաններում հաղթահարելու միֆ ստեղծել, որ ապրիլի 14-ից բոլորը վերադառնան աշխատանքի և ապրիլի համար պետությունից նպաստ չստանան:
Այն, որ Առողջապահության նախարարությունն ու պարետատունը, թեև խիստ ուշացումով կարողանում են համեմատաբար խիստ միջոցներով կանխել վարակի տարածումը և մենք հիմա անվերահսկելի իրավիճակ չունենք, լավ է, բայց այս լավը կարող է հակառակ էֆեկտ ունենալ, եթե իշխանությունը որոշի ապրիլի 14-ից հետո բոլորին վերադարձնել աշխատանքի. դա կարող է վարակի բռնկման մի նոր փուլ մտցնել երկիրը, իսկ դրա հետևանքով ստացված տնտեսական հետևանքները շատ ավելի ցավոտ կլինեն, քան եթե պետությունը իր վրա վերցնի պատասխանատվություն և ևս մեկ ամիս մարդկանց նպաստ տալով՝ պահի իրենց տներում: Երկամսյա խիստ մեկուսացումը կարող է մայիսին արդեն մեզ թույլ տալ վերադառնալ մեր բնականոն կյանքին, այնպես որ իշխանություններին կոչ ենք անում պատասխանատվությունն իրենց վրայից դեն չնետել ու իրենց իսկ մեղքով ստեղծված ծանր վիճակին համարժեք պահել իրենց:
NewsPress.am