Ինչո՞ւ բացառվեց Բալասանյանը, և ո՞վ է լինելու թրի տակով անցնողը
Երեկ ավարտվեցին Արցախի նախագահական և խորհրդարանական ընտրությունները. ֆինալ դուրս եկան Արայիկ Հարությունյանն ու սորոսական Մասիս Մայիլյանը:
Մայիլյանի վարկանիշը վերջին շրջանում անկում էր ապրել ու դա էր պատճառը, որ ամբողջ սորոսական հատվածը լծվել էր մարտի 31-ի ընտրությունները հետաձգելու քարոզին, որին չտրվեց Հայաստանը և այդ ընտրությունները կայացան:
Հիմա պարզվեց, որ սպասվում է ևս մեկ փուլ արդեն ապրիլի 14-ին, իսկ դա նշանակում է, որ մեծանում է կորոնավիրուսի Արցախ հասնելու վտանգը, եթե իհարկե դեռ չի հասել: Նույն սորոսական հատվածը այժմ լծված է երկրորդ փուլը հետաձգելու կոչերին, որպեսզի այս ժամանակն օգտագործեն ու Մայիլյանի տապալված վարկանիշի հետ կարողանան ինչ-որ բան անել: Այս ժամանակահատվածը հենց այնպես չի օգտագործում Արայիկ Հարությունյանը, նա այսօր ասուլիս տվեց և արդեն խոսում էր որպես նախագահ իր պլանների մասին:
Հարությունյանը հայտարարեց, որ բոլորի հետ պատրաստ է համագործակցության, կա մի բացառություն և այն Վիտալի Բալասանյանն է:
Արայիկ Հարությունյանը նաև բացահայտեց այդ բացառության պատճառը. չի համագործակցի Բալասանյանի հետ, որովհետև նա դեմ է ՀՀ իշխանությանը և չի անցնի ՀՀ իշխանության թրի տակով:
Պատահաբար, թե գիտակցված այս խոստովանությամբ Հարությունյանը ցույց տվեց, որ ի տարբերություն Բալասանյանի, ինքը պատրաստ է անցնել այդ թրի տակով ու այստեղ օդում կախված է մնում մի կարևոր հարց. իսկ ժողովուրդներին խաղաղության նախապատրաստելու և տարածքներն Ադրբեջանին հանձնելու հարցում ի՞նչ է անելու Արցախի նախագահը. նախընտրելու է գլխատվե՞լ, թե՞ անցնել ՀՀ իշխանության ամենազոր թրի տակով:
NewsPress.am