Ռուբեն Հայրապետյանի որդուն ուզում եք հոր դեմ որպես զե՞նք օգտագործել․ դուք սրբություն չունե՞ք․ Արիանա Հովսեփյան
ՀՖՖ նախկին նախագահ Ռուբեն Հայրապետյանի նկատմամբ հարուցված քրեական գործերը գլուխ չբերելուց և Հայրապետյանին ամեն գնով ճաղերից այն կողմ ուղարկելու անկարողությունից կատաղած՝ այս իշխանությունը որոշել է հատել բարոյականության բոլոր նորմերը և ապահովել նոր տեսարաններ հանրության ուշադրությունը այդպես կարևոր գործերից շեղելու համար:
Քանի որ Հայրապետյանն ասաց, որ ոտքերը մաքրելու է այս իշխանության վրա, իսկ դրանից հետո նրան որևէ կերպ օրենքի շրջանակում բանտ ուղարկել այդպես էլ չի ստացվում, հիմա իշխանությունը որոշել է դիմել իր պահեստային տարբերակին և ձեռքերը հասցնել նրա որդուն:
Հաշվի առնելով Հրայր Թովմասյանի և նրա դստեր հետ կատարվածը, վստահաբար կարող ենք ասել, որ նախկինների զավակներին թիրախավորելը, նրանց ծնողների դեմ որպես գործիք օգտագործելն այս իշխանության կարևոր մարտավարությունն է, որը ոչնչնացնում է այդ նույն իշխանությանը բարոյապես, արժեզրկում ու դարձնում առոչինչ:
Այն, որ երեխաներին ընդդեմ ծնողների զենք դարձնել չի կարելի, վաղուց գիտեն անգամ Պողոսներն ու ՀՀ հպարտ քաղաքացիները և այդ գիտակցման դրսևորում էր այն համատարած ամոթանքը, որը իշխանությունը ստացավ Թովմասյանի աղջկան թիրախավորելուց հետո: Հիմա ամեն գնով վրեժ լուծելու մարմաջն ու անկարողության ցասումն իշխանությանը ստիպում է Թովմասյանի ընտանիքից անցում կատարել Հայրապետյանին ու նրա որդուն:
Սխալվում է իշխանությունը, եթե մտածում է, որ Հայրապետյանի որդու նկատմամբ քրեական գործ կամ գործեր հարուցելով կարող է, բացի ինքնաոչնչացումից, որևէ այլ բանի հասնել։ Սխալվում է, որովհետև նույն ժողովուրդը, որը ժամանակին ոգևորվում էր նախկինների ու նրանց ընտանքիների դեմ հարուցված քրեական գործերով, հիմա հասկացել է՝ իշխանությունն ընդամենը ջուր է պղտորում իր կիսամեռ գոյությունը քարշ տալու համար:
Թե որքան այն կկարողանա քարշ տալ, դարձյալ կախված է ժողովրդից, որը հստակ պետք է ապրի այն գիտակցմամբ, որ թույլ տալով այսպիսի բացարձակ անարխիա, վաղը կանգնելու է արդեն իր զավակին իր դեմ որպես գործիք օգտագործելու խնդրի առաջ, և այս ուխտը չոքելու է բոլորիս դռանը, որովհետև գործ ունենք սրբություն չունեցող իշխանության հետ: Դե, իսկ մեր նորընտիր ոստիկանապետին ու այս խաղի մեջ մտած բոլորին պետք է ընդամենը ասել մեկ բան՝ ընդամենը տղա եղեք:
NewsPress.am կայքի հիմնադիր-տնօրեն Արիանա Հովսեփյան