«Պարոն Սիմոնյան, համար եք տալիս՝ զանգենք, հանդիպենք ու խաբում եք․ մենք հանրաքվեին ի՞նչ քվեարկենք, եթե խաբելով պահում եք» (տեսանյութ)

«Էթարը գնաց, բեթարն ա եկել»։ Այս մասին NEWSPRESS.am-ի հետ զրույցում ասաց Աջափնյակ վարչական շրջանի բնակչուհի Մելանյա Մովսիսյանը՝ անդրադառնալով իր վարչական շրջանի թաղապետերի նշանակումներին ու նրանց վարած քաղաքականությանը։

Մելանյա Մովսիսյանը դեռ 2014 թվականին հողհատկացման հետ կապված խնդիրներ է ունեցել և ընկել փաստաթղթային քաշքշուկների մեջ։

Երբ 2018-ին իշխանությունը փոխվեց, նա հույս ուներ, որ ամեն ինչ կհարթվի, սակայն սպասելիքները չարդարացան և, կնոջ խոսքով, բանը հասավ նրան, որ հողն ապօրինի զավթած սեփականատերերը իրեն և ամուսնուն քարերով հարվածել են։ Նա բազմիցս դիմել է այս հարցով տարբեր կառույցների, սակայն ոչ ոք խնդրին լուծում չի տվել։ Այժմ, Աջափնյակի թաղապետ Գևորգ Բաբայանին հեռացվեց աշխատանքից և նրան փոխարինելու է եկել մեկ ուրիշը, կինը դարձյալ մտահոգ է․ նրա համոզմամբ, այս մեկն էլ լավագույն տարբերակը չէ։

Կինը վստահեցնում է, որ Աջափնյակի թաղապետ Թելման Թադևոսյանը ներգրաված է ապօրինի հողհատկացման գործարքներում։

«Գումարելիների տեղերը փոխելիս՝ գումարը չի փոխվում․ մի պաշտոնից տանում են մեկ ուրիշ պաշտոնի ու դրանից ոչ մի բան չի փոխվում»,- ասում է մեր զրուցակիցը։

Վերջերս նա հանդիպել է ԱԺ փոխնախագահ Ալեն Սիմոնյանին, ով համար է փոխանցել իրեն՝ հանդիպում կազմակերպելու համար, սակայն Մելանյա Մովսիսյանը զանգահարել է և քարտուղարուհին պատասխանել է, որ հանդիպումներ չի կարող նշանակել, քանի դեռ Ալեն Սիմոնյանը իր համաձայնությունը չի տվել։

«Մեր իրավունքները ոչ մի տեղ եթե պաշտպանված չէ, ուրեմն մեզ ո՛չ «այո»-ն է պետք, ո՛չ էլ «ոչ»-ը, էս ժողովրդին խաբելով պահում են։ Ով ում հասցնում է, այս երկրում խաբում է»։

Մանրամասները՝ տեսանյութում։