Հրայր Թովմասյանը չպետք է խոսի քաղաքական ընդդիմախոսի լեքսիկոնով․ «Իմ քայլը»` ՍԴ–ի խնդրի մասին (տեսանյութ)
Սահմանադրական դատարանի դեմ խնդիրը ոչ թե անձով է պայմանավորված, այլ ՍԴ-ի գործառույթով։ Համենայնդեպս, ԱԺ «Իմ քայլը» խմբակցության ղեկավար Լիլիթ Մակունցն այսօր լրագրողների հետ հանդիպմանը հայտարարեց, որ Սահմանադրությունը 2015թ–ի սահմանադրական փոփոխություններից հետո լիարժեք չի գործում։
«ՍԴ–ի այն անցումային դրույթները, որոնք պետք է սահմանադրական նախկին ռեժիմից ներկա ռեժիմի լիարժեք անցում ապահովեին, այս պահին արված չեն։ Վստահության ճգնաժամից բացի, սա է Սահմանադրական դատարանի հետ կապված խնդիրը»,- ասաց Մակունցը։
Խնդրի հետ կապված նրա պարզաբանումը լրացրեց խմբակցության պատգամավոր Վահագն Հովակիմյանը։ Նրա գնահատմամբ էլ, պարզվում է՝ Հրայր Թովմասյանը լեքսիկոնի հետ կապված խնդիրներ ունի։
«Հրայր Թովմասյանի ոչ մի բառը չպետք է տեղավորվի քաղաքական ընդդիմախոսի լեքսիկոնի մեջ։ Նա քաղաքական գործչի դիրքերից է հանդես գալիս, ոչ թե ՍԴ նախագահի»,– ասաց պատգամավորը՝ հորդորելով լրագրողներին համեմատել, օրինակ, ՍԴ նախկին նախագահ Գագիկ Հարությունյանի և Հրայր Թովմասյանի խոսքը։
Իսկ կոնկրետ օրինակներ էլ փորձեց բերել Լիլիթ Մակունցը։ Նա հիշեցրեց Հրայր Թովմասյանի` 168.am–ին տված հարցազրույցը, որտեղ Թովմասյանը խոսել է Արցախին վերաբերող հարցի մասին։
«Երբ ՍԴ նախագահը խոսում է Արցախի հիմնախնդրից, սա ի՞նչ է, եթե ոչ քաղաքական խոսք»,– ասաց նա։
Մանրամասները՝ տեսանյութում