Լևոն Քոչարյանը` Արթուր Վանեցյանի, Հրայր Թովմասյանի և գրիչի պատմության մասին
Եթե ժամանակագրական առումով նայենք, կհասկանանք՝ երբ իշխանությունները սկսեցին հասկանալ, որ ՍԴ-ն պետք է փոխվի. դա ուղիղ կապ ունի հորս գործի հետ: Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը:
Նրա խոսքով՝ 2019 թվականի մայիսին, երբ Առաջին ատյանի դատարանը գործն ուղարկեց ՍԴ, այդ ժամանակ էլ սկսվեց այս ամբողջ գործընթացը՝ թիրախավորել ՍԴ դատավորներին, այնուհետև, օրեր անց նաև հրաժարական տվեց ԱԱԾ տնօրենը:
«Իշխանությունների կողմից Սահմանադրական դատարանի դատավորներին թիրախավորելը, ԱԱԾ նախկին տնօրեն Արթուր Վանեցյանի հրաժարականը նույն գործողության շարունակական էլեմենտներ են»,- ասաց Լևոն Քոչարյանը;
Նա, գոնե առայժմ, չի պատկերացնում իրավիճակի հանգուցալուծումը:
Ինչ վերաբերում է ՍԴ նախագահ Հրայր Թովմասյանի կողմից վարչապետ Նիկոլ Փաշինյանի գրիչ ստանալու մասին գրառմանը, ապա, ըստ Լևոն Քոչարյանի, երկրի ղեկավարի նման պահվածքը, նման խոսելաոճը, անպատասխանատու հայտարարությունները, առաջին հերթին վնասում են պետությանը:
«Ցանկություն չունեմ խորանալու գրիչի պատմության մեջ, բայց ամենայն անկեղծությամբ, առանց չարախնդալու, առանց անձնավորելու՝ կարծում եմ՝ իրոք մեր պետության համար սա լավ չէ, և կարծես՝ ես էլ եմ ամաչում այս ամենի համար, որ տեղի է ունենում: Բոլորիս ամոթն է, որ այսքան ցածրացվել է դիսկուրսի մակարդակը, խոսելաոճը, լեքսիկոնը: Չեմ կարծում, որ դա պատիվ է բերում մեր երկրին»,- եզրափակեց կրտսեր Քոչարյանը: