Մի կաթիլ տղամարդկություն է պակասում, ոչ թե մի գդալ սեր
Համահայկական ծաղրուծանակի արժանանալուց հետո իշխանությունը որոշել է քաղաքական օրակարգ բերել էլ ավելի էժան դետալներ, ինչպիսին գրիչն էր: Պարզվում է, ֆեյսբուքյան անիմաստ լայվից հետո հանրային հեգնանքն այն աստիճան է մեծացել, որ որոշվել է հրապարակ իջեցնել Ազգային ժողովի փոխնախագահ Ալեն Սիմոնյանին, որ նա մեզ պատմի այս անհաջող սերիալի հաջորդ սերիան:
Պարզվում է՝ գրիչը ո'չ առաջին դետալն է, ո'չ էլ վերջին. գրիչից բացի կա Ազգային անվտանգության ծառայության նախկին տնօրեն Արթուր Վանեցյանի զանգն ու Թովմասյանի գրկախառնությունը, այն էլ մեջքից: Նիկոլ Փաշինյանին իր իսկ փորած փոսից հանելու համար Ալեն Սիմոնյանը սկսել է խոսել, թե բա՝ գիտեք, Վանեցյանը զանգել է ինձ ու խնդրել Թովմասյանի համար. լավ, ասենք թե զանգել է, ինչքան պետք է տղամարդն առանց տղամարդկության լինի, որ ուրանա երբեմնի հարազատի հետ կիսած հացն ու այդքան նսեմանա:
Ասենք թե զանգել է, լավ, որքան մեծ պետք է լինի այդ աթոռի տված էֆեկտը, որ դու որոշես շրիշակից ներքև իջնել ու տառ-տառ պատմել ունեցածդ հեռախոսազրույցի բովանդակությունը, փաստորեն, եթե հիմա ամենավատ բամբասչի կնոջից էլ անդին պատմում ես եթերում Վանեցյանի հետ խոսք ու զրույցդ, վաղը նույն ջանասիրությամբ պատմելու ես նաև այն ամենի մասին, ինչ խոսել ես Փաշինյանի հետ, երբ այլևս իշխանական աթոռին նստած չլինես, իսկ չէ՞ որ հավերժ այդ տեղում չես լինելու, Ալեն, հետևաբար, պատկերացնում ենք, թե ինչեր ես պատմելու, երբ ժամանակը թակի քո դուռը:
Խամաճիկության գագաթնակետին գտնվող իրենց քաղաքական լուրջ դեմքեր համարողներից այլևս հոգնել ենք, կեղծ օրակարգերով մեդիադաշտը լցնելն այլևս անզոր է սվաղել, այսպես ասած, հեղափոխության տապալումը, հետևաբար ձեզ չի փրկի անգամ այն, եթե որոշեք ուղիղ եթերներում այլևս պատմել անգամ ձեր կանանց զանգերի, նվերների ու նամակների մասին: Ուշքի եկե'ք ու մի քիչ էլ տղամարդ եղեք, դա իշխանությունից հաստատ թանկ է, այն նաև ժամանակավոր չէ ու ոչ ոք ձեր ձեռքից չի կարող վերցնել: