Կապվա՞ծ են կրակոցները որևէ կերպ Ռոբերտ Քոչարյանի գրասենյակի հետ, թե՞ ոչ․ Վիկտոր Սողոմոնյանը պարզաբանել է
Քիչ առաջ տեղեկացրել էինք, որ անհայտ անձը «Էրեբունի պլազա»-ի ուղղությամբ անկանոն կրակոցներ է արձակել: Հարկ է նկատել, որ համալիրում է գտնվում ՀՀ երկրորդ նախագահ Ռոբերտ Քոչարյանի գրասենյակը։ Քոչարյանի աջակիցները, լրագրողների հետ զրույցում ակնարկեցին, որ կրակոցներ լսվել են հենց այն հարկում, որտեղ տեղակայված է գրասենյակը։
Երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանն այս լուրը NEWSPRESS.am-ի հետ զրույցում ո՛չ հերքեց, ու ոչ էլ հաստատեց։
Դիտարկմանը, թե աջակիցների փոխանցմամբ կրակոցները եղել են գրասենյակի հարևանությամբ, Վիկոր Սողոմոնյանն արձագանքեց․ «Ես որևէ տեղեկություն չունեմ իրավիճակի մասին, ընդհանրապես տեղյակ չեմ՝ ինչ է կատարվել ու չեմ կարող ոչ հաստատել և ոչ էլ հերքել տեղեկությունը։ Երբ որևէ բան պարզ դառնա՝ անպայման տեղեկություն կտամ»,- ասաց Սողոմոնյանը։
Նրա խոսքով՝ երկրորդ նախագահի գրասենյակը գտնվում է 6-րդ հարկում, սակայն պլազան բիզնես կենտրոն է, որտեղ տեղակայված են տարբեր գրասենյակներ և այս պահին չի կարող ասել՝ կապվա՞ծ են կրակոցները որևէ կերպ Ռոբերտ Քոչարյանի գրասենյակի հետ, թե՞ ոչ։