Երեք տառի մեջ, երեք տառանոցներով շրջապատված...
Իշխանության անճարակությունն այլևս նոր բարձունքներ է գրավում: Ցինիզմն ու անպակտառությունը դոմինոյի էֆեկտով տարածվում են նեոիշխանականների վրա: Նախ, գերագույն գլխավոր ասֆալտին փռողն ու պատին ծեփողն էր սուրը աջուձախ թափահարում՝ փորձելով լռեցնել նախկիններին ու ներկաներին՝ ով կհամարձակվեր թթու խոսք ասել իր իշխանության հասցեին: Այնուհետև եկավ ֆեյքերի «աստեղային ժամը». ֆեյքեր, որոնք չեն խնայում ծնող, երեխա, ընտանիք, հարազատ. եթե համարձակվել ես ասել, որ, օրինակ, Նիկոլ Փաշինյանի աչքի վերևում ունք կա, ուրեմն ազգի դավաճան ես, լավագույն դեպքում՝ «սերժական» կամ «քոչարյանական»: Ֆեյքերի ու նեոպաշտոնավորների ցինիզմը հասավ մինչև ԱԱԾ նախկին պետի ողբերգական մահ, հասավ այնտեղ, որ, օրինակ, ԱԺ փոխնախագահ Ալեն Սիմոնյանը ծաղրեց Սերժ Սարգսյանի անսահման վիշտը, իսկ համազգեստով «ոստիկանը» Հրայր Թովմասյանին գրեց՝ հաջորդը քեզ են խփելու:
Մեկ խոսքով՝ բարոյականության ճգնաժամ սկսվեց:
Թվում էր՝ ավելի վատ հնարավոր չէ. սոցցանցերը նողկանք են առաջացնում, իրականությունում՝ իրավիճակը լարվում է. փակվում են ծննդատները, սպանդանոցների հարցով բողոքի ակցիաներ են սկսվում, դրան գումարվում են բալային համակարգից՝ տաքսու վարորդների ու առաքիչների դժգոհությունները, թանկացումները և այլն:
Ու այս ամենի ֆոնին Ազգային ժողովը դառնում է թատերաբեմ: Ընդդիմությունն ամենաստոր ձևով ծաղրանքի է ենթարկվում. իշխող խմբակցությունն ու յուր անդամները ոչինչ չեն խնայում ընդդիմությանը «սևացնելու», նախորդների հետ ասոցացնելու համար: Նախ Արարատ Միրզոյանը հայտնի քաշքշոցից հետո չորս ԲՀԿ-ականի հեռացնում է դահլիճից՝ կիրառելով կարգապահական տույժ, այնուհետև հերթը հասնում է Էդմոն Մարուքյանին նախազգուշացնում հայտարարելուն: Դա էլ բավարար չէ, ֆեյսբուքյան իր էջում Միրզոյանը մկներ ու կռիսներ է հրապարակում՝ հենց իրենց մուկ ու կռիսի հետ համեմատելով:
Բաց ձեռքերով իշխանության եկածներից արդարադատության նախարարն ակնարկեց ուժ կիրառելու մասին ու կապ չունի, թե որ խումբ մարդկանց նկատմամբ:
Իսկ երեկ էլ փոխվարչապետ Ավինյանի աստղն էր փայլում. այս խորհրդարանական «կռիվների» հետ կապ չունեցող, բայց, փաստորեն, ցինիզմի մեծ պաշար ունեցող անձը, բան ու գործ թողած՝ զբաղված էր էժան «բոցեր» անելով ֆեյսբուքյան իր էջի «Սթորի» բաժնում:
Ինչ վերաբերում է «բոցերի» հերոս, նախկին չստացված փոխարտգործնախարար, իմքայլական Ռուբեն Ռուբինյանին, ապա, այո, «հիշաչար» ու փորձառու Մարուքյանը նրա «քթերով բերեց» Աշոտյանի հետ խմած սուրճն, ու հենց դա է պատճառը, որ երիտասարդը և իր շրջապատը ծանր տարան սուրճի պատմությունը: Եվ իրավացի էր Գևորգ Գորգիսյանը՝ պարտադիր չէ, որ նախկինները գնան, Ազգային ժողովում նստեն, որ նախկիններին հիշեցնեն, այո, դևին սպանողը դև է դառնում...
Մի օր քո (ձեր) թիրախում հայտնվում է նախկին պաշտոնավորը, մի օր լրագրողը, մի օր փաստաբանը, մի օր ոստիկանը, մի օր դատավորը, մի օր պատգամավորը, ու մի օր էլ հասկանում ես, որ ոտքով-գլխով 3 տառի մեջ ես, 3 տառանոցներով շրջապատված...
Սրա հետևանքներն արդեն իրենց զգալ են տալիս ու դեռ տալու են: Այսօր արդեն պարզ դարձավ, որ CDI-ը՝ Կենտրոնամետ դեմոկրատների միջազգային միությունը, նախազգուշացրել է Հայաստանի կառավարությանը դեպի ավտորիտարիզմի ճանապարհ անցնելու մասին:
Ու մարգարեական էր Վանեցյանի հեռացումի «Կանգ առ»-ի կոչը: Իսկապես կանգ առնել է պետք ու առաջին հերթին հենց Փաշինյանին է պետք կանգելը, մի լավ մտածելն ու կշռելը, ի վերջո, ոչինչ հավերժ չէ, ոչինչ կայուն չէ, ոչ իշխանությունը, ոչ փառքը, ոչ էլ խփած ու մարսած տոկոսները...