Վաղարշապատի դպրոցի տնօրեն է «դարձել» կոռուպցիայի մեջ մեղադրվող, մեկ այլ դպրոցից վտարված տնօրեն. դպրոցում բունտ է (տեսանյութեր)
Վաղարշապատի Գարեգին Նժդեհի անվան թիվ 8 հիմնական դպրոցի տնօրեն Եստեր Գալստյանն այսօր է իմացել, որ ինքն այլևս տնօրեն չէ՝ տնօրենի ընտրության արդյունքներին տեղյակ չի եղել, ու նման շրջադարձ էլ չէր սպասում:
Նա NEWSPRESS.am-ի հետ զրույցում նկատեց, որ նախնական արդյունքներով, քվեարկությունը եղել է իր օգտին, սակայն դրսից՝ «անկախ» փորձագետներից, ստացված 3 ձայնը գնացել է նոր տնօրենի՝ Շուշանիկ Ոսկանյանի օգտին: Առավոտյան իմանալով կատարվածի մասին՝ Եստեր Գալստյանը դպրոց չի գնացել, իսկ աշակերտներն իրենց ուսուցիչների և ծնողների հետ միասին, չեն նահանջել: Նրանք նոր տնօրենի դեմ բողոքի ակցիա են կազմակերպել:
Եստեր Գալստյանը չի հասկանում, թե ինչու այսպես եղավ: Նրա խոսքով՝.ընտրություններն անօրինական եղանակներով են տեղի ունեցել: Գալստյանը նկատում է, որ ընտրությունից հետո արձանագրություն չի կազմվել, և միայն ընտրությունից 2 օր հետո: Նա էլի փաստարկներ է բերում, որոնք խոսում են խախտումների մասին, բայց միևնույն ժամանակ դեմ է բողոքի ակցիաներին:
«Ես 15 տարի աշխատել եմ ու հասցրել եմ հարգանք վայելել, փառքով պսակել իմ անցած ճանապարհը։ Աշակերտները, ծնողներն ու իմ կոլեկտիվը գնահատում է իմ աշխատանքը, թեկուզև այս ակցիաները այդ են վկայում, բայց դեմ եմ նման ակցիաներին ու չեմ ուզում, որ երեխաների դասապրոցեսը խոչընդոտվի»:
Եստեր Գալստյանը նաև նկատում է, որ հեղափոխությունից հետո միշտ մտածել է, որ անարդար ճանապարհով ոչինչ չի լինելու, սակայն այն, ինչ կատարվել է հիմա, նա համարում է, որ հեղափոխության սկզբունքներին դեմ է:
«Ես մտածում էի, որ այսուհետ մեր վարչապետը թույլ չի տա անօրինական ու անարդար քայեր լինեն: Փաստորեն, ներքևի օղակներում մնացել են մարդիկ, ովքեր գատնի ճանապարհներով կարողանում են հակառակ աշխատել երկրի ղեկավարի պահանջներին: Հանրությունը իմ կողքին, որովհետև հասկանում է, որ արդար բան չի եղել: Ես կուզեի, որ այդ մասին իմանար նաև վարչապետը: Մենք հեղափոխություն ենք արել, որ բոլոր մարդիկ իրենց տեղում լինեն, բայց պարզվում է՝ ցածր օղակներում գտնվող մարդիկ կարող են մարդկանց ճակատագրերի հետ խաղալ»,- ասաց Եստեր Գալստյանը:
NEWSPRESS.am-ին չհաջողվեց կապ հաստատել նաև ավելի շատ ձայն «հավաքած» տնօրենի՝ Շուշանիկ Ոսկանյանի հետ, սակայն հիշեցման կարգով հարկ ենք համարում նկատել, որ նույն այս տնօրենը աշխատել է Արմավիրի մարզի Բաղրամյան համայնքի դպրոցում: Հեղափոխությունից հետո, 2018-ի մայիսին, իրենց իրավունքները վերականգնելու և դպրոցում իշխող կոռումպացված համակարգից ազատվելու համար Բաղրամյանի դպրոցի աշակերտներն ու ծնողները բողոքի ակցիաներ կազմակերպեցին:
Նրանց ոգևորել էր հեղափոխական շարժումը և այլևս չէին պատրաստվում լուռ մնալ: Ծնողները վստահեցնում էին, որ տնօրենն ամեն առիթով իրենցից գումաներ է պահանջել:
Այս համայքնի բնակիչնեին հաջողվեց «դպրոցից վտարել» տնօրեն Ոսկանյանին, սակայն վերջինս հանգիստ չմնաց իր տեղում: Ասում են, որ նա ևս մի քանի տեղ իր բախտը փորձելով ու արդյունքի չհասնելով՝ այժմ օգտագործել է նախկին կապերն ու փորձում է հաստատվել Վաղարշապատի թիվ 8 դպրոցի տնօերնի պաշտոնում:
Աշակերները դեմ են, ծնողներն ու ուսուցիչները ևս, սակայն գոնե առայժմ նախարարությունից լռում են:
Հիշեցման կարգով, տեղադրում ենք նաև տեսանյութը, որը պատմում է Շուշանիկ Ոսկանյանի դեմ նախկինում տեղի ունեցած բողոքի ակցիաների մասին:
Արմինե Մկրտումյան